Një periudhë kritike po nis për Granit Xhakën, i cili pritet të paraqitet para Prokurorisë Publike të Lucernit për t’u marrë në pyetje lidhur me dyshimet për përdorimin e një certifikate të falsifikuar vaksinimi kundër COVID-19.
Të lidhura
None found
Kapiteni i Kombëtares së Zvicrës dhe futbollisti i Sunderlandit kishte shfrytëzuar disa ditë pushimi pas një kalendari të ngjeshur. Më 27 shtator, ai festoi 33-vjetorin me bashkëshorten Leonitën në Grantley Hall, në North Yorkshire. Më pas, Xhaka kaloi kohë me vajzat e tij në një fermë kungujsh në Northumberland, pranë Sunderlandit.
Tani, vëmendja është përqendruar te hetimi që mund të sjellë pasoja të rëndësishme për të.
Xhaka pritet të udhëtojë gjatë kësaj jave në Lucern, ku do të japë deklaratë para prokurorëve. Autoritetet nuk kanë bërë të ditur datën apo orën e saktë të marrjes në pyetje.
Prokuroria po heton 33-vjeçarin nën dyshimin se ka përdorur një dokument të rremë vaksinimi. Në shtator, Xhaka pranoi publikisht se kishte blerë një certifikatë, ndonëse nuk ishte vaksinuar, dhe kërkoi falje për veprimin e tij.
Ai deklaroi gjithashtu se ishte i gatshëm të bashkëpunonte plotësisht me institucionet përgjegjëse.
Kjo situatë zhvillohet në të njëjtën javë kur Kombëtarja e Zvicrës është mbledhur në Lucernë.
Përfaqësuesja zvicerane, e drejtuar nga Murat Yakin, do të përballet të martën me Maqedoninë e Veriut, ndërsa Xhaka nuk do të jetë pjesë e këtij grumbullimi.
Vendimi për mungesën e tij është marrë në mënyrë të përbashkët nga Federata Zvicerane e Futbollit dhe vetë lojtari.
Presidenti i federatës, Peter Knabel, kishte deklaruar: “Pas përfundimit të kësaj periudhe ndërkombëtare, do ta rivlerësojmë situatën së bashku me Granitin dhe do të diskutojmë hapat e ardhshëm”.
Për këtë arsye, ditët në vijim mund të jenë përcaktuese si për procedurën ligjore, ashtu edhe për vazhdimësinë e Xhakës me Kombëtaren e Zvicrës.
Një aspekt tjetër i ndjeshëm i çështjes lidhet me vendin ku dyshohet se është përdorur certifikata.
Sipas Federatës Zvicerane, dokumenti nuk ishte përdorur për ndeshjet e Kombëtares apo për turnetë e mëdha ndërkombëtare.
Megjithatë, është raportuar se Xhaka mund ta ketë përdorur certifikatën gjatë turneut parasezonal të Arsenalit në Shtetet e Bashkuara, në korrik të vitit 2022.
Në atë periudhë, shtetasit e huaj duhej të ishin të vaksinuar për të hyrë në SHBA. Xhaka ishte pjesë e Arsenalit në atë turne dhe luajti ndaj Evertonit dhe Chelseat.
Ende nuk është përcaktuar nëse certifikata është përdorur dhe në çfarë rrethanash ka ndodhur një gjë e tillë.
Po aq e pasigurt mbetet edhe e ardhmja e tij me përfaqësuesen zvicerane. Federata pritet të shqyrtojë situatën pasi të mbyllet procedura dhe të bëhet i ditur çdo dënim i mundshëm.
Deri tani, nuk është marrë asnjë vendim zyrtar për rolin e Xhakës te Kombëtarja.
Pas publikimit të skandalit, Peter Knabel kishte thënë se të gjitha skenarët mbeteshin të hapur, përfshirë mundësinë që Xhaka të vazhdonte si kapiten.
“Diskutimet do ta japin përgjigjen. Ne po i mbajmë të gjitha mundësitë të hapura”.
Federata synon fillimisht të zhvillojë një takim personal me mesfushorin. Vetëm pas kësaj bisede do të vendoset nëse ai do të rikthehet në Kombëtare në nëntor dhe nëse do ta ruajë shiritin e kapitenit.
Xhaka është lojtari me më shumë paraqitje në historinë e Zvicrës, me 152 ndeshje, dhe konsiderohet një prej figurave kryesore të kësaj përfaqësueseje në Kupën e Botës 2026 dhe në turnetë e mëparshëm./
