Dinamo ka bërë të ditur se Ardi Kabashi do t’i bashkohet skuadrës gjatë këtij sezoni në detyrën e videoanalistit. Klubi kryeqytetas e prezantoi afrimin e ri përmes rrjeteve sociale, ku e cilësoi Kabashin si “ekspert” në fushën e tij.
Kabashi zotëron licencën UEFA A për trajner dhe vjen te Dinamo pas një eksperience gjashtëvjeçare te Ballkani, klub i Superligës së Kosovës. Gjatë qëndrimit atje, ai ka qenë pjesë e stafit teknik dhe është angazhuar në analizën dhe përgatitjen e ekipit.
Të lidhura
None found
Për tre sezone, Ardi Kabashi ka punuar në krah të trajnerit Ilir Daja. Ky bashkëpunim do të vijojë tashmë në Superiore, me të dy që do të jenë pjesë e stafit të Dinamos.
Përvoja e tij në analizën tekniko-taktike, si edhe njohja me filozofinë e punës së Dajës, pritet të përbëjnë një vlerë të shtuar për “blutë” e kryeqytetit. Për këtë arsye, afrimi i Kabashit mund të konsiderohet një përforcim i rëndësishëm për stafin teknik të skuadrës.
Klubi i Futbollit Dinamo i ka uruar mirëseardhjen Ardi Kabashit në familjen dinamovite.
