Një debat diplomatik ka përfshirë Korenë e Jugut dhe Ukrainën, pasi presidenti ukrainas Volodymyr Zelenskyy bëri publik lajmin se dy ushtarë koreano-veriorë, të kapur ndërsa luftonin në krah të Rusisë, ishin dërguar në Korenë e Jugut.
Të lidhura
None found
Sipas analizës së “The Guardian”, Seuli i ka kërkuar Kievit shpjegime dhe një kërkimfalje zyrtare, duke pretenduar se të dyja palët kishin rënë dakord që transferimi të mbahej konfidencial.
Çështja u bë publike javën e kaluar, kur Zelenskyy foli në Asamblenë e Përgjithshme të OKB-së dhe deklaroi se Ukraina kishte transferuar në Republikën e Koresë dy të burgosur lufte nga Koreja e Veriut.
Të hënën, Ministria e Jashtme e Koresë së Jugut thirri të ngarkuarin me punë të Ukrainës në Seul, duke kërkuar një falje në nivel qeveritar.
Debati mes dy vendeve lidhet kryesisht me faktin nëse ekzistonte një mirëkuptim për të mos bërë publik informacionin mbi transferimin e ushtarëve.
Autoritetet koreano-jugore pretendojnë se Kievi kishte kërkuar ruajtjen e konfidencialitetit, ndër të tjera për shkak të frikës se humbja e mundësisë për shkëmbimin e tyre me të burgosur ukrainas do të sillte kritika brenda vendit.
Seuli thotë se e respektoi këtë kërkesë për të mbrojtur sigurinë e dy burrave dhe familjeve të tyre, por edhe për arsye që lidhen me diplomacinë dhe sigurinë.
Pas deklaratës së presidentit ukrainas në OKB, presidenti i Koresë së Jugut, Lee Jae Myung, tha se Ukraina kishte shkelur një “marrëveshje moszbulimi”.
Ky version është kundërshtuar nga Dmytro Lytvyn, këshilltari i Zelenskyyt, i cili deklaroi se mes palëve nuk kishte pasur një marrëveshje të tillë.
Zyra e presidentit Lee e cilësoi pretendimin e Kievit si të pavërtetë dhe paralajmëroi se një qëndrim i tillë e dëmton rëndë besimin mes dy qeverive.
Ministria e Jashtme e Koresë së Jugut këmbënguli se kishte ekzistuar një “marrëveshje e qartë”. Kur u pyet nëse ajo ishte hedhur në një dokument të shkruar, ministria tha se të dyja palët kishin rënë dakord ta trajtonin çështjen në mënyrë konfidenciale.
Ambasada e Ukrainës në Seul nuk ka bërë një koment publik për këtë pretendim.
Dy ushtarët u kapën nga forcat ukrainase në rajonin Kursk të Rusisë në janar 2025. Ata ishin pjesë e trupave koreano-veriore të dërguara për të luftuar në mbështetje të Rusisë.
Pas arrestimit, të dy deklaruan se dëshironin të shkonin në Korenë e Jugut, ndërsa Seuli, i cili i konsideron koreano-veriorët shtetas të vet, kishte shprehur më herët gatishmërinë për t’i pranuar.
Në korrik, Volodymyr Zelenskyy dhe Lee Jae Myung ranë dakord që zgjidhja e çështjes të respektonte vullnetin e lirë të dy ushtarëve.
Raportohet se dy të burgosurit kanë mbërritur në Korenë e Jugut përmes një vendi të tretë në fillim të këtij muaji.
Pheniani nuk ka reaguar publikisht deri tani për transferimin e tyre në Korenë e Jugut.
Ministria e Bashkimit e Koresë së Jugut deklaroi se nuk kishte konstatuar ndonjë zhvillim lidhur me këtë çështje dhe se do të vijonte ta ndiqte situatën.
Koreja e Veriut ka lavdëruar më herët ushtarët e saj që kanë vrarë veten për të shmangur rënien rob gjatë luftimeve.
Ekspertët e cituar në raport vlerësojnë se dërgimi në Korenë e Jugut i dy ushtarëve që mbijetuan dhe zgjodhën të mos ktheheshin në Veri mund të jetë veçanërisht delikat për regjimin e Phenianit.
Seuli ka dënuar pushtimin rus të Ukrainës, është rreshtuar me sanksionet perëndimore dhe i ka dhënë Kievit mbështetje financiare.
Në korrik, Koreja e Jugut njoftoi një paketë ndihme me vlerë 100 milionë dollarë.
Pavarësisht kësaj mbështetjeje, Seuli nuk ka pranuar të dërgojë drejtpërdrejt armë në Ukrainë, në zbatim të politikës së tij për të mos furnizuar me armë vdekjeprurëse shtetet që ndodhen në luftë.
Rusia ishte një prej partnerëve të rëndësishëm tregtarë të Koresë së Jugut përpara nisjes së luftës në shkallë të plotë. Në të njëjtën kohë, qeveria e presidentit Lee ka shfaqur interes për përmirësimin e marrëdhënieve me Korenë e Veriut.
