Presidentja e Komisionit Evropian, Ursula von der Leyen, i ka propozuar Kanadasë që të bëhet “anëtarja e parë e asociuar” e Bashkimit Evropian.
Të lidhura
None found
Gjatë fjalës së saj në Parlamentin Evropian në Strasburg, ku ishte i pranishëm edhe kryeministri kanadez Mark Carney, von der Leyen theksoi se BE-ja dhe Kanadaja kanë vlera demokratike të përbashkëta dhe qëndrime të ngjashme për çështje si inteligjenca artificiale, klima, lufta në Ukrainë dhe zhvillimet gjeopolitike.
“Ne duam ta çojmë marrëdhënien me Kanadanë në nivelin më të lartë të mundshëm. Ne duhet të riimagjinojmë urgjentisht partneritetet tona. Prandaj, do të doja të punoja me ju për të hapur derën që Kanadaja të jetë anëtarja e parë e asociuar e BE-së”, u shpreh von der Leyen.
Carney, i cili pritet të mbajë një fjalim në Parlamentin Evropian të enjten, kishte kërkuar më herët ndërtimin e një “aleance unike” mes Kanadasë dhe BE-së.
Propozimi është bërë në një periudhë kur Kanadaja po përpiqet të pakësojë varësinë e saj nga marrëdhëniet tregtare me Shtetet e Bashkuara.
