Drejtori i përgjithshëm i Bursës së Stambollit (Borsa Istanbul), Korkmaz Enes Ergun, është arrestuar gjatë një hetimi të gjerë mbi transaksionet në tregjet e kapitalit dhe çështjen e fondeve të investimit.
Sipas Agjencisë Shtetërore të Lajmeve Anadolu, Ergun është ndaluar nën dyshimin se është pjesë e një organizate të krijuar për kryerjen e veprave penale, si dhe për ryshfet. Prokuroria e Përgjithshme e Stambollit e ka konfirmuar arrestimin, duke bërë të ditur se hetimet lidhur me fondet vijojnë.
Të lidhura
None found
Çështja lidhet me dyshime për manipulim të tregut të aksioneve dhe shkelje në administrimin e fondeve të investimit. Hetimi u bë publik pasi disa fonde nuk arritën të përmbushnin kërkesat e investitorëve për tërheqjen e parave. Më 17 shtator, Bordi i Tregjeve të Kapitalit në Turqi urdhëroi likuidimin e 131 fondeve të investimit, të menaxhuara nga shtatë kompani të ndryshme.
Në fokusin e autoriteteve janë vendosur drejtues të kompanive financiare, administratorë fondesh dhe persona të tjerë të lidhur me sektorin e biznesit. Ergun ka rreth 28 vite përvojë në tregjet financiare dhe në bursën turke. Ai e ka nisur karrierën në Bursën e Stambollit, ku ka udhëhequr procese që lidhen me listimin e kompanive, mbikëqyrjen e tregut dhe veprimtaritë financiare.
Ergun është gjithashtu nënkryetar i bordit drejtues të Takasbank dhe anëtar i bordit të Federatës Botërore të Bursave. Arrestimi i tij përbën zhvillimin më të fundit në hetimin e gjerë financiar që ka prekur sektorin turk të investimeve. Deri tani, autoritetet nuk kanë bërë publike detaje të plota mbi provat konkrete ndaj tij, ndërsa procedurat hetimore vazhdojnë.
