Një zjarr i fuqishëm shpërtheu gjatë natës në një hotel të vendosur në qendër të zonës turistike malore të Ponte di Legno, në provincën e Brescias, Itali. Për shkak të përhapjes së flakëve në një pjesë të godinës, autoritetet urdhëruan evakuimin e të gjithë personave që ndodheshin brenda.
Rreth 21:00 u dha alarmi për situatën. Nga rindërtimi paraprak dyshohet se zjarri nisi në oxhakun e hotelit dhe u përhap brenda pak minutash në një pjesë të madhe të çatisë prej druri, duke prekur më pas edhe katin e fundit.
Të lidhura
None found
Për shuarjen e flakëve u angazhuan mbi 50 zjarrfikës, përfshirë edhe ekipe të ardhura nga rajoni fqinj i Trentos. Të 40 pushuesit që ishin në hotel u nxorën në kohë dhe shpëtuan, ndërsa të paktën 16 prej tyre morën ndihmë mjekësore për shkak të një intoksikimi të lehtë nga tymi.
Ndërhyrja e forcave zjarrfikëse vazhdoi gjatë gjithë natës dhe ekipet qëndruan në terren deri në orët e para të mëngjesit, kur situata u vu plotësisht nën kontroll. Megjithatë, dëmet në hotel janë të konsiderueshme: çatia prej druri është dëmtuar rëndë, ndërsa kati i tretë, i ndërtuar në formë mansarde, është prekur nga rënia e materialeve dhe veprimet për shuarjen e zjarrit.
Struktura kryesore e ndërtesës ka mbetur e paprekur dhe godina nuk është shembur, por autoritetet e kanë konsideruar atë të papërshtatshme për banim dhe përdorim. Ndërkohë, kanë nisur hetimet për përcaktimin e shkaqeve të sakta, ndërsa dyshimi i parë lidhet me oxhakun e hotelit. Ngjarja nuk pati viktima, pasi evakuimi në kohë i pushuesve shmangu pasoja më të rënda.
