Drejtori i Përgjithshëm i Policisë së Shtetit, Ardi Veliu ka reaguar pas furisë që ka shkaktuar në rrjetet sociale justifikimi që ai i bëri dhunës së punonjësve të policisë ndaj një 15 vjeçari.
Gjatë raportimit në Komisionin Parlamentar të Sigurisë, Veliu përdori videon e nënës së 15 vjeçarit, e cila mbante një armë në dorë, për të treguar se djali i dhunuar nga policia vinte nga një familje me probleme. Më pas, video e Zaida Çobos rezultoi se ishte pjesë e xhirimit të një filmi dhe se arma ishte lodër.
Partia Demokratike dhe shumë personalitete të jetës publike në Shqipëri po kërkojnë dorëheqjen e Veliut, por ky i fundit thekson se detyrën e Drejtorit të Policisë e ka mbajtur “dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona”.
Numri 1 i Policisë së Shtetit nuk sqaron përse përdori një video filmi kundër familjes së djalit të dhunuar, por kërkon ndjesë nëse “kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!”
Sipas Veliut, kritikat që po drejtohen ndaj tij janë kritika dhe sulme ndaj Policisë së Shtetit.
Reagimi i plotë i Ardi Veliut
Jam i keqardhur që Policia e Shtetit bëhet rregullisht shënjestra e atyre që kurrë nuk e thanë një fjalë motivuese për të dhe sot përsëri e njëjta gjë.
Ndërkohë që ne jemi organizata më rigoroze në goditjen e fenomeneve brenda vetes, mjafton që një punonjës i ynë të bëjë një gabim dhe megjithëse ndëshkohet në radhë të parë prej nesh, prapëseprapë goditja vijon ndaj Policisë së Shtetit.
Sot unë jam vënë personalisht në shënjestër dhe më vjen keq për deformimin që po i bëhet realitetit të ngjarjes për të cilën fola dhe vetë qasjes sime ndaj saj.
Së pari, fjala ime nuk mund të nxirret nga konteksti siç po bëhet.
Së dyti, kam bërë një ilustrim të idesë se nuk mundet të fajësohet gjithnjë e vetëm punonjësi i Policisë duke u kapur pas një fotoje të rastit, pa konsideruar tërë kontekstin e një situate.
Së treti, kam sqaruar se punonjësi në fjalë është pezulluar dhe ka nisur hetimi disiplinor dhe penal për të.
Së katërti, unë po komunikoja hapur me deputetët, një shqetësim që është i mbarë punonjësve tanë, për demonizimin që i bëhet figurës së Policit të Shtetit dhe nuk doja të thosha më shumë se kaq.
Por në fund dëshiroj t’u them të gjithë atyre që po e gjykojnë me ngut këtë “krim” të radhës, se nëse nuk kam arritur dot ta sqaroj si duhet atë çka kisha qëllim, kjo nuk mjafton për të më gjykuar me qëllim.
Këtë detyrë e kam mbajtur dhe do ta mbaj deri në fund me nder dhe puna ka folur e do të flasë për mua dhe Policinë e Shtetit më mirë se sa fjalët tona.
Ndjesë nëse kam krijuar një keqkuptim me komentin tim dhe besoj se kushdo që do të gjykojë pa paramendim dhe pa e menduar edhe këtë si rastin e radhës për të baltosur Policinë e Shtetit, do të gjejë arsye për ta pranuar ndjesën time!
