Shqipëria e nisi me triumf rrugëtimin në Ligën e Kombeve, duke mposhtur Bjellorusinë 2 – 0 në stadiumin “Air Albania”. Pas përfundimit të takimit, Ernest Muçi foli për mediat për paraqitjen dhe rolin e tij në ekipin kombëtar.
Të lidhura
None found
“Nuk mund të them ende nëse e kam fituar rolin tim te Kombëtarja, pasi këtu grumbullohen lojtarët më të mirë shqiptarë. Jam shumë i kënaqur që pata mundësinë të luaja, veçanërisht sepse në të kaluarën nuk kam marrë shumë minuta”, u shpreh Muçi.
Duke folur për çlirimin pas golit, ai theksoi se mungesa e aktivizimit të rregullt shoqërohet me pritshmëri të mëdha. “Kur nuk luan shpesh, presioni është i pranishëm. Do të bësh krenarë të tjerët. Pas golit ndihesh më i lirë dhe kjo është e vërtetë. Moshatarët e mi kanë nga 30-40 ndeshje me Shqipërinë. Nëse do të kem më shumë hapësira, do të jap maksimumin”, tha ai.
Muçi foli edhe për Mohamed Salah, duke e përshkruar si një futbollist pa shumë qëndrime prej superylli. “Salah nuk është ai superstari që mund të mendosh. Është një njeri me këmbë në tokë, shumë i thjeshtë dhe i gatshëm të ndihmojë. Kam mësuar shumë prej tij”, përfundoi futbollisti.
