Ndeshja e parë e Mark Bellingham me përfaqësuesen angleze të veteranëve mbi 50 vjeç u shoqërua me shtatë gola të realizuar prej tij. Babai i yjeve të futbollit Jude dhe Jobe Bellingham ishte protagonist në suksesin 13-1 të Anglisë përballë Republikës së Irlandës, në takimin e luajtur në Cambridgeshire.
Sulmuesi 50-vjeçar e gjeti rrjetën gjashtë herë para pushimit. Në pjesën e dytë, ai shtoi një tjetër gol dhe dha edhe një asistim, duke regjistruar një debutim të jashtëzakonshëm.
Të lidhura
None found
Kjo paraqitje përkoi me një fundjavë të veçantë për familjen Bellingham, gjatë së cilës në fushë zbritën edhe dy djemtë e Markut.
Në fitoren 3-0 të Real Madridit kundër Racing Santander, Jude Bellingham arriti kuotën e 50 golave me fanellën madrilene. Jobe Bellingham, nga ana tjetër, ishte pjesë e Borussia Dortmundit në derbin me Bayern Munichun, i mbyllur në barazim 2-2.
Të dy vëllezërit e kanë vënë vazhdimisht në dukje rolin e rëndësishëm të babait në karrierat e tyre. Mbështetja e Markut i ka shoqëruar që në hapat e parë në Birmingham dhe më pas gjatë rrugës drejt futbollit profesionist.
Mark Bellingham, i cili mbushi 50 vjeç në mars, renditet ndër sulmuesit më të njohur të ligave të ulëta angleze, me një karrierë të spikatur në futbollin amator.
Mediat angleze raportojnë se bilanci i tij gjatë karrierës i kalon 700 gola. Mes skuadrave ku ka luajtur janë Leamington, Stourbridge dhe Sutton Coldfield Town.
Aftësia për të shënuar i ka dhënë nofkën “Pelé i futbollit të ligave të ulëta”. Ndonëse e njoftoi zyrtarisht tërheqjen nga futbolli në vitin 2019, Bellingham vijoi të luante në turnetë e veteranëve, deri kur mori ftesën për të veshur fanellën e Anglisë.
