Ankesa e Federatës së Futbollit të Argjentinës (AFA) për masat disiplinore pas finales së Kupës së Botës 2026 është pranuar vetëm pjesërisht nga FIFA. Nahuel Molina do të jetë i pezulluar për katër ndeshje në vend të shtatë, ndërsa për Leandro Paredes mbetet në fuqi ndalimi prej 10 ndeshjesh.
Sipas njoftimit të AFA-s, FIFA ka reduktuar edhe gjobën për Molinën, nga 90,000 në 60,000 dollarë. Për Paredes nuk ka ndryshim as në detyrimin financiar: krahas pezullimit të plotë, ai duhet të paguajë gjobën e vendosur fillimisht prej 90,000 dollarësh.
Të lidhura
None found
Dënimi me 10 ndeshje i Paredes lidhej me agresionin ndaj Gavit në finalen e korrikut, ku Spanja mposhti Argjentinën me rezultatin 1-0. Ndërkohë, masat ndaj Molinës u morën për incidentet pas përfundimit të takimit.
Përpara se t’i drejtohet Gjykatës së Arbitrazhit Sportiv (CAS), AFA bëri të ditur se do t’i kërkojë FIFA-s arsyetimin e plotë të vendimeve. Federata argjentinase vlerëson se faktet dhe baza ligjore ofrojnë argumente të mjaftueshme për të kërkuar rishikimin e sanksioneve.
Në paketën fillestare të masave disiplinore ishin përfshirë edhe Thiago Almada, me një ndeshje pezullim, si dhe Roberto Ayala, pjesëtar i stafit trajner të Argjentinës, i cili ishte pezulluar për tre ndeshje.
Gjithashtu, ndaj AFA-s ishte vendosur një gjobë prej 321,000 dollarësh dhe detyrimi për të zhvilluar ndeshje me kufizime për spektatorët. Këto masa pasuan incidentet me brohoritje diskriminuese në përballjet e Argjentinës me Kepin e Gjelbër, Egjiptin, Zvicrën, Anglinë dhe Spanjën.
