Aktori i njohur i zërit Peter Cullen ka ndërruar jetë në moshën 85-vjeçare. Ai ishte një nga emrat më të spikatur të animacionit, i njohur gjerësisht për interpretimin e Optimus Prime në serinë “Transformers” dhe të Eeyore në disa projekte të “Winnie-the-Pooh”.
Të lidhura
None found
Vdekja e tij u konfirmua të mërkurën nga agjenti Kevin Motley.
Cullen u nda nga jeta në banesën e familjes së tij në Los Angeles, pranë njerëzve të tij më të afërt. Familja deklaroi se ai vdiq “i rrethuar nga familja e tij e dashur dhe i mbajtur në zemrat e miqve të shumtë dhe të panumërtëve fansa në mbarë botën”.
Roli me të cilin Peter Cullen u identifikua më shumë ishte Optimus Prime, udhëheqësi i Autobots në botën e “Transformers”. Timbri i tij i veçantë dhe imponues u kthye në një nga tiparet më të dallueshme të këtij personazhi, të cilin e shoqëroi në një numër të madh projektesh ndër vite.
Një vend të rëndësishëm në karrierën e tij zinte edhe Eeyore, gomari i zymtë dhe pesimist i universit “Winnie-the-Pooh”. Cullen e interpretoi këtë personazh në disa produksione, duke e bërë atë një nga rolet më të dashura të tij.
Përgjatë një karriere të gjatë, ai u vlerësua si një nga aktorët më të respektuar të zërit, ndërsa interpretimet e tij u bënë të njohura për disa breza publiku.
Në reagimin e saj, familja u kërkoi admiruesve që trashëgiminë e aktorit ta nderojnë jo vetëm përmes kujtimit të krijimtarisë së tij artistike, por edhe duke përqafuar vlerat që ai mishëronte.
Të afërmit e Cullen u bënë thirrje njerëzve të kontribuojnë në komunitetet e tyre dhe t’i udhëheqin të tjerët me dhembshuri, integritet dhe besnikëri.
Familja e mbylli mesazhin për fansat me frazën që, sipas saj, përmbledh filozofinë e Cullen: “Jini mjaftueshëm të fortë për të qenë të butë.”
