Rita Ora ka folur hapur për prejardhjen e saj shqiptare dhe rrugëtimin e familjes së saj nga Kosova drejt suksesit në Britaninë e Madhe, duke u shprehur se ndihet krenare për historinë e saj si emigrante.
Këngëtarja shqiptaro-britanike tregoi se përvoja e familjes së saj ka pasur një ndikim të madh në formimin e saj si artiste dhe si person. Rita, e cila aktualisht po punon në albumin e saj të katërt dhe është rikthyer në rolin e Mbretëreshës së Zemrave në filmin “Descendants”, kujtoi vështirësitë me të cilat u përballën prindërit e saj pas largimit nga Kosova.
Të lidhura
None found
E lindur në Prishtinë, Rita u largua me familjen në fillim të viteve ’90, gjatë periudhës së vështirë për shqiptarët e Kosovës. Nëna e saj, Vera, ishte mjeke, ndërsa babai Besnik ekonomist, por pasi u vendosën në Mbretërinë e Bashkuar, ata nisën një jetë të re dhe u përshtatën me sfidat e emigrimit.
Në një intervistë për “The Times”, Rita tha se nuk ka ndier kurrë turp për historinë e saj dhe se është mirënjohëse për mundësitë që i janë dhënë.
“Gjithçka që di është se do të jem gjithmonë mirënjohëse për arsimimin që kam marrë dhe krenare që jam emigrante”, u shpreh ajo.
Artistja theksoi se shumë emigrantë kanë një dëshirë të veçantë për të provuar veten dhe për të arritur më shumë në jetë.
“Mendoj se shumë emigrantë kanë një energji të veçantë. Ndoshta kanë një ndjenjë se duhet të dëshmojnë veten, që i shtyn të përmirësohen vazhdimisht”, tha Rita.
Këngëtarja foli gjithashtu për dëshirën e saj për të bashkëpunuar në të ardhmen me bashkëshortin e saj, regjisorin Taika Waititi, në një projekt filmik.
Përveç karrierës artistike, Rita ndau edhe detaje personale për shëndetin e saj, duke treguar se ka vendosur të ruajë vezët e saj në moshë të re dhe se historia e nënës së saj me trajtimin e kancerit të gjirit e ka bërë më të vetëdijshme për kujdesin ndaj trupit dhe ndryshimet që sjell mosha.
Rita Ora mbetet një nga artistet shqiptare më të njohura ndërkombëtarisht, ndërsa shpesh ka folur me krenari për rrënjët e saj dhe historinë e familjes që e ka shoqëruar në rrugën drejt famës.
