Ambasadori i BE-së, Michalis Rokas, u shpreh se për ndryshimet e bllokuara në Kodin Zgjedhor vazhdojnë ende diskutimet dhe se për këtë proces është i domosdoshëm konsensusi mes palëve. Ai vlerësoi se vetë kodi, në thelb, është i mirë.
Të lidhura
None found
Gjatë promovimit të pajisjeve të reja ushtarake në kazermat Ilinden, Rokas deklaroi se ODIHR dhe KE kanë dhënë vlerësim pozitiv, ndërsa sipas tij ajo që mbetet për t’u zgjidhur janë modalitetet. Ai tha se e kupton që ekzistojnë mospajtime pikërisht për këto modalitete, por shtoi se ndien se ka vullnet të mirë për t’i tejkaluar ato.
Rokas theksoi se Komisioni Parlamentar për Zgjedhjet tashmë po punon dhe shprehu shpresën që palët do të mund të ulen së bashku dhe të arrijnë konsensus për këtë temë të ndjeshme, që lidhet me një çështje kaq të rëndësishme. Sipas tij, themelet e ligjit dhe vetë ligji janë vërtet të mira.
Ndërkohë, amendamentet në Kodin Zgjedhor kanë mbetur pezull. Pikë e debatueshme mbetet votimi elektronik nga diaspora. Qeveria i kërkoi opozitës të pajtohet për një debat konstruktiv, në vend të pengimit parlamentar, duke theksuar se Kodi Zgjedhor bën pjesë në detyrimet reformuese të Maqedonisë. Nga ana tjetër, LSDM akuzoi për një përpjekje për vjedhje të votave zgjedhore.
