Daniela Dimovska u betua solemnisht para Këshillit Gjyqësor, duke marrë zyrtarisht detyrën e kryetares së Gjykatës Themelore Penale Shkup.
Të lidhura
None found
Në mandatin e saj, ajo synon të ruajë ritmin efikas të punës, të pakësojë numrin e lëndëve të vjetra dhe të forcojë transparencën e institucionit.
Gjatë një interviste për “Telma”, Dimovska tha se në 14 muajt e fundit gjykata ka shënuar një rënie të ndjeshme të numrit të lëndëve dhe të rasteve të vjetra të pazgjidhura.
“Me dhënien e betimit mund të premtoj se do të vazhdojmë me të njëjtin ritëm dhe dinamikë. Gjatë 14 muajve të fundit kemi arritur të zvogëlojmë numrin e lëndëve të reja dhe jemi një nga gjykatat e rralla efikase në vend. Kemi arritur ta ulim numrin e lëndëve të vjetra që rrezikonin parashkrimin me 53 për qind. Kemi arritur që këtë vit të mos kemi asnjë lëndë të parashkruar”, deklaroi Dimovska.
Kryetarja e re nënvizoi gjithashtu se gjykata po punon me shumë më pak staf në krahasim me disa vite më parë. “Fatkeqësisht, kemi 130 punonjës më pak se para disa vitesh dhe, me këtë numër të reduktuar të punonjësve, arrijmë ta përballojmë fluksin e lëndëve”, tha Dimovska.
Dimovska vlerësoi se administrata gjyqësore përballet me pjesën më të rëndësishme të ngarkesës së përditshme dhe se puna e saj është thelbësore për funksionimin e gjyqtarëve.
“Pikërisht administrata gjyqësore e mban barrën më të madhe të punës. Nuk mund ta harroj, sepse ata janë forca thelbësore që qëndron pas nesh, gjyqtarëve”, theksoi kryetarja e re e Gjykatës Themelore Penale Shkup.
