Kryeopozitari bullgar është shprehur pro hapjes së negociatave me Maqedoninë e Veriut dhe Shqipërine.
“Nëse qeveria bullgare bën lëshime ndaj Maqedonisë së Veriut dhe i dorëzon në Parlament, ne jemi të gatshëm t’i mbështesim”, deklaroi ish-kryeministri bullgar dhe lider i partisë më të madhe opozitare në Sofje, Bojko Borisov në intervistën për gazetën 24 orë.
I pyetur nëse plani i propozuar nga kryeministri i ri bullgar, Kirill Petkov për formimin e grupit të punës për dialog do të funksiononte, Borisov theksoi se mundet “vetëm t’i dëshirojë sukses” dhe “nëse i duhet mbështetje, do t’ia japë”.
Sipas Borisovit, “Shkupit i është thënë se i ka “dy-tri” tema që duhet të zgjidhen, pakicat, të ndryshojë Kushtetuta, të qartësohet historia dhe më pas të vazhdojë më tej”.
“Bullgaria në asnjë rast nuk e ka ndaluar Maqedoninë e Veriut”, pohon Borisov, duke shtuar se “nuk është e mundur të hyhet në BE dhe të mbarten probleme me vete”, prandaj Sofja “vetëm i ka ngadalësuar” Shkupin dhe Tiranën.
Kujtojmë se vetua e Bullgarisë mbi Maqedoninë e Veriut rëndon edhe mbi Shqipërinë, pasi të dy vendet janë pjesë e së njëjtës strategji të zgjerimit të BE./albeu.com/
