Gjatë një interviste në Dita Jonë në A2 CNN, zëdhënësja e Partisë Demokratike, Floriana Garo, ka rrëfyer marrëdhënien me liderin demokrat Sali Berisha, duke u shprehur se ai është më i miri në Partinë Demokratike.
E pyetur nëse Berisha duhet t’ia lërë vendin dikujt tjetër në parti, Garo u përgjigj se nuk është kreu demokrat problemi në PD.
Të lidhura
None found
“Mund të them që zoti Berisha nga çfarë unë kam parë në PD. Unë besoj që është më i miri në PD, e them me plot bindje, jo si zëdhënëse e PD. Ai është me dritë-hije. Ka gabimet e veta, por ai punon më shumë se kushdo tjetër, ka forcë karakteri më shumë se kushdo dhe nuk mendoj që Berisha është problemi i PD, siç mund ta thonë të tjerë. Gara është e hapur kush të dojë të garojë. Shumë thonë që garoj, po të iki Berisha, kjo nuk është e drejtë”, tha Garo.
Teksa foli për marrëdhënien me Berisha ajo theksoi se në shumë raste e kërkon mendimin e saj, por vendimet i merr vetë.
Ajo e përshkroi liderin demokrat si jo shumë të lexueshëm, ndërsa të tjerët në PD sipas saj nuk janë të drejtpërdrejtë dhe të hapur me të.
“Mendoj që e kërkon mendimin tim me raste të caktuara. Në disa përudha ai do ta dijë se çfarë mendoj dhe ka momente që është shumë i qartë. Nuk është shumë i lexueshëm si natyrë. Ai do mendim, vendimet i merr vetë. Por do ti dëgjojë mendimet e të tjerëve. Brenda partisë jo të gjithë janë të drejtpërdrejtë e të hapur me të”.
Gjithashtu, Garo foli edhe për karrierën e saj politike të cilën e sheh si një shërbim ndaj njerëzve.
