Mali i Tërbunit në Pukë është përfshirë nga zjarri pasditen e sotme, ndërsa erërat dhe terreni i vështirë po favorizojnë përhapjen e flakëve në sipërfaqe të konsiderueshme pyjore.
Bashkia Pukë njofton se ndërhyrja është e vështirë për shkak të relievit malor, i cili pengon lëvizjen dhe depërtimin e mjeteve zjarrfikëse në zonat e prekura.
Të lidhura
None found
Në vendngjarje ndodhen strukturat e Bashkisë Pukë, Shërbimi Zjarrfikës, shërbimi pyjor dhe punonjës të shërbimeve, të angazhuar në përpjekjet për izolimin dhe shuarjen e vatrave të zjarrit.
Situata paraqitet alarmante pasi flakët po rrezikojnë dhe po djegin sipërfaqe pyjore në malin e Tërbunit.
Bashkia Pukë u ka bërë thirrje banorëve, të rinjve dhe të gjithë qytetarëve që dëshirojnë të ndihmojnë, t’i bashkohen përpjekjes së përbashkët për ruajtjen e pyjeve dhe pasurisë natyrore.
Solidariteti dhe vullnetarizmi qytetar konsiderohen të rëndësishëm në këtë situatë. Qytetarët që duan të kontribuojnë apo të mbështesin punën në terren mund të kontaktojnë strukturat përgjegjëse të Bashkisë Pukë.
Çdo ndërhyrje nga qytetarët duhet të kryhet vetëm në koordinim me strukturat profesionale dhe duke respektuar udhëzimet e tyre, në mënyrë që të shmangen rreziqet për jetën dhe sigurinë.
Bashkia e cilëson Tërbunin si një pasuri të Pukës dhe u bën apel të gjithëve që, në këtë moment kur pyjet kërcënohen nga zjarri, të bashkohen me përgjegjësi dhe solidaritet për mbrojtjen e tij.
Puka ka nevojë për bashkëpunimin e të gjithëve më shumë se kurrë. Apeli është për mbrojtjen e përbashkët të Tërbunit dhe pyjeve.
