Ardhja e sezonit veror dhe kërkesa më e madhe, veçanërisht nga turistët e huaj, kanë shkaktuar një valë tjetër shtrenjtimi për frutat, perimet dhe produktet e shportës në Vlorë.
Qytetarët thonë se po e kanë gjithnjë e më të vështirë ta përballojnë këtë situatë. Sipas tyre, nevojitet kontroll më i madh mbi çmimet, të cilat vazhdojnë të ngrihen në një kohë kur pagat dhe pensionet qëndrojnë në të njëjtat nivele.
Të lidhura
None found
Kostoja e lartë i ka detyruar konsumatorët të kufizojnë sasinë e mallrave që blejnë. Shumë prej tyre tregojnë se nuk bëjnë më furnizimet e zakonshme, por marrin vetëm aq sa u duhet për përdorim personal, në sasi të vogla dhe ndonjëherë edhe me kokrra.
Vështirësitë po ndihen edhe nga tregtarët. Ata pohojnë se dobësimi i fuqisë blerëse është reflektuar drejtpërdrejt te shitjet, pasi qytetarët marrin më pak produkte dhe, si rrjedhojë, ka rënë edhe xhiroja e bizneseve.
Tregtarët shpjegojnë se zinxhiri i shtrenjtimit fillon te furnitorët. Mallrat sigurohen me një kosto më të madhe dhe, pas përfshirjes së marzhit të fitimit, konsumatori përballet me një çmim përfundimtar edhe më të lartë.
Në këto kushte, shtrenjtimi po prek si familjet që duhet të sigurojnë produktet e përditshme, ashtu edhe tregtarët që kërkojnë t’i shesin ato, duke e vështirësuar përballimin e shpenzimeve të zakonshme.
