Përdorimi keqdashës i inteligjencës artificiale ose një luftë bërthamore mund ta vërë njerëzimin përballë rrezikut të zhdukjes deri në fund të këtij shekulli.
Të lidhura
None found
Ky është paralajmërimi i një studimi të botuar në revistën shkencore The Lancet, që rendit 17 kërcënime të mëdha për shëndetin dhe mbijetesën e njerëzimit në 75 vitet e ardhshme.
Krahas inteligjencës artificiale dhe armëve bërthamore, studimi veçon krizën klimatike, pandemitë, ndotjen e ajrit, rezistencën antimikrobike dhe kequshqyerjen e fëmijëve. Në listë janë edhe konfliktet konvencionale, pakësimi i ndihmës ndërkombëtare, konsumimi i tepruar i alkoolit, hipertensioni, pabarazia e të ardhurave, niveli i ulët i arsimimit, obeziteti, problemet e shëndetit mendor, duhanpirja dhe plakja e pashëndetshme.
Për hartimin e listës, studiuesit shqyrtuan prirjet aktuale dhe përllogaritën vitet e jetës me shëndet të mirë që mund të humbasin për shkak të sëmundjeve, paaftësisë ose vdekjes së parakohshme të lidhur me secilin rrezik.
Sipas ekspertëve, këto kërcënime nuk duhen parë veçmas: ato lidhen me njëri-tjetrin dhe mund t’ia rëndojnë pasojat njëri-tjetrit. Përballimi i tyre kërkon veprim të bashkërenduar dhe vendime të përgjegjshme në nivel ndërkombëtar.
“Shëndeti dhe mirëqenia e brezit të ardhshëm do të varen nga vendimet që udhëheqësit marrin sot”, u shpreh profesori Christopher Murray, bashkëkryetar i komitetit të The Lancet që realizoi studimin dhe drejtor i Institutit për Metrikat dhe Vlerësimin e Shëndetit në Universitetin e Uashingtonit.
Studimi vëren se disa nga skenarët më ekstremë kanë probabilitet të ulët, por, nëse realizohen, pasojat mund të jenë katastrofike dhe të kërcënojnë vetë ekzistencën e njerëzimit.
Gjetjet theksojnë nevojën për të vepruar herët ndaj rreziqeve globale, pasi politikat e sotme do të ndikojnë drejtpërdrejt në sigurinë, shëndetin dhe cilësinë e jetës së brezave të ardhshëm.
