Gjatë festivalit tradicional të San Ferminit në Pamplona të Spanjës është shënuar një tjetër ngjarje e rëndë, pasi një vrapues u plagos seriozisht në fytyrë nga briri i një demi.
Në këtë episod mbetën të lënduar edhe 12 persona të tjerë, gjatë vrapimit të pestë me dema, që konsiderohet një prej aktiviteteve më të njohura dhe më të rrezikshme të këtij festivali.
Të lidhura
None found
Në rrugicat e ngushta të qytetit në veri të Spanjës u lëshuan gjashtë dema, të cilët vrapuan mes qindra pjesëmarrësve që përpiqeshin t’u shmangeshin. Itinerari zgjati afërsisht dy minuta e gjysmë dhe gjatë tij shumë persona ranë në kalldrëm, ndërsa demat vijuan rrugën drejt arenës, ku më vonë gjatë ditës u vranë nga toreadorët.
Spitali Universitar i Navarrës bëri të ditur se një burrë mori plagë të rënda në fytyrë pas goditjes me bri, ndërsa 12 persona të tjerë morën ndihmë mjekësore për lëndime të ndryshme.
Pamjet e regjistruara nga vendi i ngjarjes tregojnë se në nisje të garës një dem i zi u nda nga grupi dhe u hodh drejt turmës së vrapuesve, duke goditur një prej tyre në anën e fytyrës. Deri tani, autoritetet nuk kanë konfirmuar nëse bëhet fjalë për të njëjtin person që mbeti i plagosur rëndë.
Vrapimi i zhvilluar të shtunën ishte i pesti nga tetë vrapimet tradicionale që organizohen gjatë festivalit të San Ferminit, një prej eventeve më të famshme në Spanjë.
Këtë vit përkon edhe 100-vjetori i botimit të romanit “Dielli gjithashtu lind” të Ernest Hemingway, libri që e bëri festivalin e San Ferminit të njohur në të gjithë botën.
Ndonëse rasti i fundit me humbje jete gjatë vrapimeve me dema është regjistruar në vitin 2009, plagosjet nga brirët dhe frakturat vazhdojnë të jenë të zakonshme. Çdo vit, përveç banorëve vendas me përvojë, pjesë e këtij aktiviteti bëhen edhe shumë turistë pa eksperiencë.
Pjesëmarrësit paraqiten tradicionalisht të veshur me rroba të bardha, të shoqëruara me rrip dhe shall të kuq, që janë simbol i festivalit. Nga ana tjetër, organizatat për mbrojtjen e kafshëve vijojnë të protestojnë çdo vit kundër këtij eventi, duke e konsideruar atë një praktikë mizore dhe të pajustifikuar ndaj kafshëve.
