Analiza e votimit në landin Meklenburg-Pomerania Perëndimore ka nxjerrë në pah një ndarje të qartë politike në Gjermani: qendrat urbane priren të mbështesin më shumë socialdemokratët, ndërsa zonat rurale po orientohen gjithnjë e më tepër drejt Alternativës për Gjermaninë, AfD-së. Sipas ekspertëve, kjo prirje nuk kufizohet vetëm te Gjermania, por po shfaqet edhe në vende të tjera, mes tyre Franca dhe Shtetet e Bashkuara.
Të lidhura
None found
SPD-ja, e drejtuar gjatë fushatës nga kryeministrja në detyrë Manuela Schwesig, pati rezultatet më të mira në qytete, ku niveli mesatar i arsimimit të votuesve është më i lartë. Megjithatë, përmirësimi i partisë nuk mjaftoi për ta shpallur fituese, pasi ajo siguroi 35,5% të votave, rreth tre pikë përqindjeje më pak se AfD-ja.
Mbështetja për të Gjelbrit dhe të Majtën ishte gjithashtu rreth dy herë më e lartë në qytete sesa në zonat rurale. Kjo e forcon lidhjen e vërejtur mes nivelit arsimor dhe një mbështetjeje më të dobët për AfD-në. Ndërkohë, CDU-ja nuk shënoi diferenca të mëdha mes zonave urbane dhe atyre rurale, pasi pësoi rënie të ndjeshme në të dyja kategoritë.
Një zhvillim i ngjashëm ishte konstatuar edhe dy javë më parë në Saksoni-Anhalt, ku AfD-ja në shumë zona rurale e kapërceu pragun e 50% të votave. Andreas Möller, drejtues i komunikimit në një kompani të madhe private, e cilëson këtë përplasje si një “Kulturkampf”, ose betejë kulturore, ndërmjet qyteteve dhe zonave rurale.
Sipas Möller, banorët e qyteteve shpesh i perceptojnë me vonesë pasojat e ndryshimeve strukturore që kanë prekur pjesën tjetër të vendit.
