Gjykata e Assizes në Mantova të Italisë ka shpallur fajtore 47-vjeçaren Rosa Capuano për vrasjen e babait të saj, Francesco Capuano, 79 vjeç, duke e dënuar me 25 vite burg.
Në seancën e fundit të procesit, e pandehura ndryshoi qëndrim dhe pranoi se ishte ajo që kishte vrarë të atin. Përpara trupit gjykues, ajo tha se nuk mund të duronte më, ndaj kishte marrë armën dhe e kishte qëlluar për vdekje.
Të lidhura
None found
Pranimi i autorësisë solli një zhvillim vendimtar në gjykim, pasi deri në atë moment Rosa Capuano e kishte kundërshtuar vazhdimisht përfshirjen e saj në krim. Edhe gjatë marrjes në pyetje më 9 tetor, ajo kishte këmbëngulur se ishte e pafajshme dhe se nuk e kishte vrarë babanë. Në dëshminë e fundit, megjithatë, pranoi se kishte qëlluar ndaj tij për t’u çliruar nga prania e tij dominuese.
Vrasja u krye më 23 dhjetor të vitit 2024 në Suzzara, pjesë e provincës së Mantovës. Francesco Capuano u qëllua me armë zjarri nga e bija teksa ndodhej brenda makinës së parkuar në garazhin e pallatit në rrugën Biolcheria, ku të dy banonin së bashku.
Mediat lokale raportojnë se jeta e 47-vjeçares zhvillohej thuajse plotësisht nën ndikimin e babait, prej të cilit ajo varej financiarisht. Sipas asaj që kishte rrëfyer vetë, ajo duhej t’i shpjegonte atij çdo veprim të përditshëm. Ndonëse kishte shprehur synimin për të pasur më shumë pavarësi, nuk kishte mundur të shkëputej prej tij.
Dënimi i dhënë përputhet me kërkesën e prokurores Alessia Silimbani, e cila kishte kërkuar 25 vite burg. Duke marrë parasysh pranimin e autorësisë, prokurorja kishte përjashtuar burgimin e përjetshëm dhe kishte kërkuar që rrethanat lehtësuese të njiheshin në raport me ato rënduese.
Në vendimin e saj, gjykata nuk i cilësoi motivet e ulëta dhe të parëndësishme si rrethanë rënduese. Ndërkohë, ajo vlerësoi si të tilla paramendimin dhe kryerjen e vrasjes ndaj një paraardhësi, konkretisht babait të së pandehurës. Rrethanave lehtësuese iu dha peshë e barabartë me rrethanat e tjera rënduese.
Për tre vëllezërit dhe motrën e Rosa Capuanos, familjarë të viktimës, gjykata caktoi gjithashtu një dëmshpërblim paraprak prej 150 mijë eurosh. Shuma e njohur për secilin prej tyre është 50 mijë euro.
