Pesë vjet pas vrasjes së presidentit të atëhershëm të Haitit, Jovenel Moise, autoritetet amerikane kanë marrë në dorëzim 18 persona të ekstraduar nga Haiti, të cilët dyshohen se kanë marrë pjesë në atentatin e vitit 2021.
Të lidhura
None found
Prokurori federal amerikan që po ndjek çështjen, Jason Redding Quinones, e cilësoi këtë zhvillim si një etapë të re dhe të rëndësishme në përpjekjet për të nxjerrë përgjegjësit para drejtësisë. Lajmi u bë publik të dielën.
“Pesë vjet pas ngjarjeve, ne vazhdojmë t’i sjellim të dyshuarit para drejtësisë amerikane dhe ende nuk kemi mbaruar”, shkroi Quinones në platformën X. Ai bëri të ditur gjithashtu se në lidhje me këtë çështje janë ngritur akuza ndaj 30 personave.
Një prej të ekstraduarve është Joseph Felix Badio, ish-pjesëtar i njësisë kundër korrupsionit në Haiti, e cila ishte në varësi të Ministrisë së Drejtësisë. Burime nga qeveria e përkohshme dhe policia haitiane e konsiderojnë atë një nga figurat kryesore të dyshuara në këtë rast.
Personat e tjerë të dërguar në Shtetet e Bashkuara janë mercenarë kolumbianë, sipas të njëjtave burime.
Jovenel Moise, 53 vjeç, u vra gjatë natës mes 6 dhe 7 korrikut 2021, kur një grup i armatosur sulmoi rezidencën e tij private në Port-au-Prince. Truprojat e presidentit nuk ndërhynë gjatë sulmit.
Pas atentatit, policia haitiane arrestoi menjëherë rreth 40 persona, përfshirë rreth 20 mercenarë kolumbianë. Megjithatë, procesi hetimor në Haiti është penguar vazhdimisht nga problemet e sistemit të drejtësisë.
Në SHBA, paralelisht me procedurat haitiane, janë ngritur akuza ndaj 11 personave për përfshirje të dyshuar në planin për vrasjen e Moise. Sipas prokurorëve amerikanë, komploti për vrasjen ose rrëmbimin e presidentit ishte organizuar në Florida.
Për këtë çështje, pesë persona janë dënuar me burgim të përjetshëm në Shtetet e Bashkuara. Katër të tjerë u shpallën fajtorë në maj për disa akuza, mes tyre edhe për komplotin për të vrarë ose rrëmbyer presidentin e atëhershëm të Haitit.
Vrasja e Moise ndodhi në një periudhë kur Haiti përballej prej vitesh me pasiguri politike, vështirësi ekonomike dhe dhunë. Kriza është rënduar edhe më tej vitet e fundit nga aktiviteti i bandave.
Haiti nuk ka zhvilluar zgjedhje që nga viti 2016 dhe, pas vrasjes së Moise, vendi nuk ka pasur një president.
Sipas një vlerësimi të publikuar në qershor nga Organizata Ndërkombëtare për Migracionin (IOM), rreth 1.5 milionë persona nga afro 11 milionë banorët e Haitit janë zhvendosur brenda vendit për shkak të dhunës. Sulmet nuk janë kufizuar vetëm në kryeqytetin Port-au-Prince.
Autoritetet zgjedhore kanë planifikuar që raundi i parë i zgjedhjeve presidenciale dhe parlamentare të mbahet në dhjetor, ndërsa raundi i dytë pritet të zhvillohet në shkurt 2027.
