Një operacion dyjavor i Policisë së Shtetit italian, i zhvilluar në bashkëpunim me 106 drejtoritë e policisë në të gjithë vendin, përfundoi me 644 të arrestuar: 575 të rritur dhe 69 të mitur. Aksioni synonte parandalimin dhe goditjen e kriminalitetit te të rinjtë, si në veprimtarinë individuale, ashtu edhe në atë të grupeve të organizuara.
Të arrestuarit dyshohen për vepra penale kundër personit dhe pronës, si edhe për shkelje të lidhura me lëndët narkotike dhe armët, përfshirë trafikimin e drogës. Efektivët e 106 skuadrave të lëvizshme kontrolluan gjithsej 236.138 të rinj, nga të cilët 23.060 ishin të mitur.
Të lidhura
None found
Policia procedoi penalisht në gjendje të lirë edhe 1.695 persona. Mes tyre ishin 373 të mitur, të dyshuar për përvetësim sendesh të vjedhura, mbajtje armësh e mjetesh të rrezikshme dhe posedim të lëndëve narkotike me qëllim shpërndarjen.
Sipas autoriteteve, ndër veprat kriminale më të shpeshta ishin tentativat për vrasje, plagosjet, përleshjet në grup, dëmtimi i pronës, zhvatja, vjedhjet, grabitjet, si dhe shpërndarja e lëndëve narkotike dhe substancave psikotrope. Policia thotë se disa prej këtyre veprimeve publikoheshin në rrjetet sociale nga vetë autorët.
Nga operacioni u sekuestruan 69,4 kilogramë kokainë, 328,44 gramë heroinë, 174,8 kilogramë kanabis dhe produkte të tjera kanabinoide. U gjetën gjithashtu sasi më të vogla ekstazie, ketamine e amfetamine, si edhe kapsula Lyrica dhe benzodiazepina.
Kontrollet në banesa dhe ambiente të tjera zbuluan sende që dyshohet se rridhnin nga vjedhjet, mes tyre varëse ari, tableta, telefona celularë dhe veshje. Policia sekuestroi gjithashtu 269.863 euro para të gatshme.
Mes sendeve të sekuestruara ishin 28 armë zjarri, të shkurtra dhe të gjata, si dhe 210 armë të ftohta. U gjetën edhe 25 mjete të tjera të rrezikshme: 6 kaçavida, 2 shkopinj bejsbolli, 2 shkopinj teleskopikë, 2 pistoleta me ajër të kompresuar (soft air), 1 pistoletë gjysmëautomatike me fishekë manovër, 1 pistoletë lodër, 6 spraj me spec djegës, 2 doreza metalike për goditje, 1 thikë prerëse për materiale dhe 2 kapuçë për mbulimin e fytyrës.
Përveç këtyre, policia sekuestroi disa mjete shpërthyese, bateri tubash me një qitje, bombola me spraj irritues, thika prerëse dhe mjete që dyshohet se përdoreshin për hapjen e dyerve dhe kryerjen e vjedhjeve. Aksioni bën pjesë në masat e autoriteteve italiane kundër kriminalitetit të të rinjve, veçanërisht në zonat e njohura për shpërndarjen e drogës dhe për frekuentimin e lartë gjatë natës.
