Në kuadër të samitit të ASEAN-it në Manila të Filipineve, sekretari amerikan i Shtetit, Marco Rubio, zhvilloi një takim me ministrin e Jashtëm rus, Sergey Lavrov, në një kohë kur konfliktet në Ukrainë dhe Iran po intensifikohen.
Të lidhura
None found
Rubio dhe Lavrov nuk iu përgjigjën pyetjeve të gazetarëve mbi pretendimet se Rusia po e përkrah Iranin në sulmet kundër forcave amerikane. Ata nuk komentuan as nëse Moska synon ta ndërpresë ofensivën ushtarake në Ukrainë.
Një ditë përpara takimit, sekretari amerikan i Shtetit kishte bërë të ditur se lufta në Ukrainë do të përfshihej në bisedimet me homologun e tij rus.
“Nuk e di nëse fjala e duhur është ta vë nën presion. Do të flasim për këtë. Lufta në Ukrainë ka penguar në shumë aspekte bashkëpunimin mes SHBA-së dhe Rusisë, por kjo nuk do të thotë se nuk do të kërkojmë fusha të tjera bashkëpunimi,” deklaroi Rubio.
Ai theksoi gjithashtu se Uashingtoni synon përfundimin e luftës në Ukrainë dhe do të vlerësojë nëse janë krijuar rrethana të reja që mundësojnë rifillimin e negociatave për paqe.
Bisedimet mes dy kryediplomatëve u mbajtën ndërsa nismat diplomatike për ndalimin e luftës në Ukrainë kanë mbetur në vendnumëro. Në të njëjtën kohë, konflikti ndërmjet SHBA-së dhe Iranit është rindezur përmes sulmeve të ndërsjella, të cilat kanë shkaktuar viktima në të dyja palët.
Gjatë fushatës, presidenti amerikan Donald Trump kishte deklaruar se do ta përfundonte luftën në Ukrainë brenda 24 orëve nga rikthimi i tij në Shtëpinë e Bardhë. Megjithatë, mbi 500 ditë pas fillimit të mandatit të dytë të Trumpit, lufta vazhdon dhe nuk duket se ka një marrëveshje paqeje në horizont.
