Pasditen e së mërkurës, 5 gusht, gjashtë qendra tregtare në zonën e Milanos u evakuuan për shkak të një kërcënimi me bombë të dërguar përmes postës elektronike.
Të lidhura
None found
Alarmi u dha rreth orës 17:30, pasi drejtuesit e këtyre strukturave morën një email me përmbajtje të njëjtë dhe me subjektin “Lexo urgjentisht”. Dërguesi pretendonte se kishte vendosur disa mjete shpërthyese, me synimin për të shkaktuar sa më shumë viktima.
Në të njëjtin mesazh, sipas raportimeve, autori kërkonte edhe një takim me Presidentin e Republikës së Italisë, Sergio Mattarella.
Autoritetet italiane reaguan menjëherë duke nisur kontrolle në të gjashtë vendet e përfshira: qendrën tregtare Cupole në San Giuliano Milanese, Fiordaliso në Rozzano, qendrën tregtare Bonola, pikën e shitjes Scalo Milano në Locate Triulzi, Carosello në Carugate dhe Akuariumin në Vignate.
Karabinierët, të cilët kanë marrë drejtimin e hetimeve, mbërritën në zonat e evakuuara së bashku me njësitë e qenve antieksplozivë, policinë lokale dhe zjarrfikësit. Verifikimet brenda ambienteve të qendrave tregtare po vazhdojnë për të përcaktuar nëse ndodhet ndonjë pajisje e dyshimtë.
