Grupi islamist Kataib Hezbollah, i njohur si Brigadat e Hezbollahut në Irak, ka deklaruar se do të japë 10 milionë dollarë për personin që vret presidentin amerikan Donald Trump ose merr pjesë në përgatitjen e një sulmi kundër tij.
Të lidhura
None found
Sipas këtij grupi, oferta paraqitet si kundërpërgjigje ndaj sulmit ajror amerikan të vitit 2020, ku humbën jetën Qassem Soleimani, komandant i Gardës Revolucionare të Iranit, dhe Abu Mahdi al-Muhandis, zëvendëskomandant i forcave irakiane Hashd al-Shaabi.
Në njoftim sqarohet se shpërblimi nuk kufizohet te personi që mund të kryejë një sulm ndaj Trumpit. Ai u ofrohet gjithashtu individëve, grupeve apo organizatave që do të ndihmonin, organizonin ose lehtësonin një operacion të tillë.
E ashtuquajtura Rezistenca Islamike në Irak e ka dënuar atë që e përshkruan si “agresionin e qeverisë amerikane, të përfaqësuar nga krimineli Trump”, duke e konsideruar atë përgjegjës për vrasjen e Soleimanit dhe al-Muhandis.
“Vrasësi i tyre nuk do t’i shpëtojë drejtësisë dhe turpi do ta ndjekë atë, si dhe qeverinë e tij, për aq kohë sa të jetojnë”, citohet të thuhet në deklaratë.
Organizata bën të ditur se shuma prej 10 milionë dollarësh është siguruar përmes kontributeve të anëtarëve dhe mbështetësve të saj. Në përmbyllje të deklaratës, ajo thekson se “hakmarrja mbetet një premtim i shenjtë”, duke ripërsëritur kërcënimet ndaj presidentit amerikan.
