Rassemblement National, forca e ekstremit të djathtë në Francë, ka nisur përgatitjet për zgjedhjet presidenciale të vitit 2027, teksa pret vendimin e apelit për Marine Le Pen. Ajo përballet me rrezikun për t’u përjashtuar nga gara për shkak të një çështjeje që lidhet me keqpërdorimin e fondeve të Bashkimit Europian.
Të lidhura
None found
Në rast se Le Pen nuk merr dritën jeshile për të kandiduar, emri që pritet të përfaqësojë RN-në është Jordan Bardella. Sipas sondazheve, si Le Pen ashtu edhe Bardella do të dilnin në krye të raundit të parë, çka e bën mundësinë e një fitoreje të RN-së më të afërt se asnjëherë më parë.
Sipas analistëve, rritja e mbështetjes për partinë lidhet me përpjekjen e saj për t’u shkëputur nga perceptimi i dikurshëm si forcë radikale dhe për t’u paraqitur si një subjekt politik i përgatitur për të marrë drejtimin e qeverisë.
Edhe në raport me politikën e jashtme, RN po rishikon qëndrimet e veta ndaj Gjermanisë. Në ndryshim nga e shkuara, Bardella ka folur me tone vlerësuese për kancelarin Friedrich Merz, duke nënvizuar ekzistencën e një “bazë e përbashkët ideologjike”, sidomos për emigracionin dhe kundërshtimet ndaj disa politikave të BE-së që lidhen me klimën.
Po ashtu, Rassemblement National është larguar nga partia gjermane AfD, të cilën e sheh si tepër radikale. Megjithatë, ekspertët theksojnë se një sukses elektoral i RN-së mund të krijojë fërkime mes Parisit dhe Berlinit, veçanërisht në çështje që lidhen me energjinë, buxhetin e BE-së dhe integrimin evropian.
Megjithëse këto mospajtime mund të ekzistojnë, pritshmëritë janë që bashkëpunimi franko-gjerman të mos dëmtohet. Si shembull për këtë përmendet rasti i qeverisë së Giorgia Melonit në Itali, e cila pas marrjes së pushtetit u shndërrua në një partnere funksionale për vendet e BE-së.
