Josue Martinez, gazetar që mbulonte kryesisht çështjet e sigurisë publike, është vrarë në shtetin Puebla të Meksikës, një ngjarje që rikthen në vëmendje dhunën ndaj punonjësve të medias në këtë vend.
Të lidhura
None found
Martinez drejtonte agjencinë e lajmeve Noticias San Martín Texmelucan dhe raportonte kryesisht për ngjarje kriminale dhe temat e sigurisë. Organizata për lirinë e medias Article 19 u kërkoi autoriteteve që në hetimin e vrasjes të konsiderojnë si pistë kryesore veprimtarinë e tij gazetareske.
Autoritetet e shtetit Puebla dënuan vrasjen dhe kërkuan zhvillimin e një hetimi të plotë për sqarimin e rastit.
Mediat lokale raportojnë se gazetari u qëllua për vdekje nga dy persona që udhëtonin me motoçikletë, vetëm disa metra nga shtëpia e tij. I biri ndodhej pranë tij në çastin e sulmit dhe njoftoi menjëherë policinë.
I njohur me nofkën “El Jaguar”, Josue Martinez kishte ushtruar profesionin e avokatit përpara se t’i përkushtohej gazetarisë. Ai ishte gjithashtu pjesë e shoqatës për të drejtat e njeriut Cre-Arte.
Vrasja e Martinez ndodh pak javë pasi u konfirmua vdekja e gazetares Roxana Guzmán, e cila ishte rrëmbyer nga banesa e saj në shtetin Veracruz. Në qershor u vra edhe gazetari i pavarur Luis Ángel López Valdés, ndonëse ndodhej nën mbrojtjen e autoriteteve për shkak të kërcënimeve të marra më herët.
Sipas Article 19, që prej marrjes së detyrës nga presidentja Claudia Sheinbaum në tetor 2024, në Meksikë janë vrarë të paktën 10 gazetarë. Kjo e vendos vendin mes më të rrezikshmëve në botë për gazetarët që punojnë jashtë zonave të luftës.
Organizata Reporterët pa Kufij (RSF) ka bërë të ditur se në Meksikë u vranë nëntë gazetarë gjatë vitit 2025. Sipas të dhënave të saj, që nga viti 1994 në vend janë shënuar të paktën 150 vrasje të punonjësve të medias.
