Një fëmijë 4-vjeçar ka vdekur gjatë natës në Spitalin Pediatrik të Palermos, në Itali. Mjekët dyshojnë se shkak mund të ketë qenë difteria, një infeksion tepër i rrallë në Itali, por që në format e rënda mund të çojë në vdekje.
Të lidhura
None found
Ende nuk ka një konfirmim përfundimtar mbi shkaqet e vdekjes. Për këtë arsye, Prokuroria e Palermos ka kërkuar kryerjen e autopsisë, për të sqaruar rrethanat dhe për të kontrolluar nëse procedurat mjekësore janë zbatuar siç duhet.
Vajza u paraqit të shtunën në mbrëmje në spitalin Cervello, në gjendje shumë të rënduar. Pas intubimit të menjëhershëm, ajo u dërgua në reanimacionin e Spitalit Pediatrik, por pavarësisht ndërhyrjeve të mjekëve, humbi jetën gjatë natës.
“Ne bëmë gjithçka që ishte e mundur për ta shpëtuar fëmijën që nga momenti që e morëm. Fatkeqësisht, nuk patëm rezultatin që shpresonim”, deklaroi Domenico Cipolla, drejtori mjekësor i spitalit Civico.
Analizat e para të kryera nga autoritetet shëndetësore kanë nxitur dyshimet për difteri. Megjithatë, përgjigjja përfundimtare pritet vetëm pasi Instituti Kombëtar Italian i Shëndetit të përfundojë testet e tjera.
Mes rrethanave që po shqyrtohen është edhe mungesa e vaksinimit të vajzës. Sipas të dhënave të bëra publike, prindërit u kishin deklaruar mjekëve se kishin zgjedhur të mos e vazhdonin procesin e vaksinimit.
Ky vendim dyshohet se lidhej me frikën për një raport të mundshëm mes vaksinave dhe autizmit, pas një rasti autizmi të evidentuar në familje.
Prokuroria po heton arsyet që çuan në mosvaksinimin e fëmijës, si edhe respektimin e procedurave të përcaktuara. Autopsia dhe ekzaminimet mikrobiologjike pritet të japin përgjigjen përfundimtare për shkaqet e vdekjes.
Difteria është një sëmundje akute bakteriale që shkaktohet nga Corynebacterium diphtheriae. Disa variante të bakterit prodhojnë një toksinë të fuqishme, e cila mund të dëmtojë rëndë indet dhe organet jetësore.
Kur prek sistemin e frymëmarrjes, infeksioni mund të prekë fytin, hundën dhe bajamet, duke shkaktuar temperaturë, dhimbje fyti dhe vështirësi në frymëmarrje. Një shenjë tipike e saj është formimi i një membrane gri në fyt.
Në format më të rënda, kjo membranë mund të bllokojë rrugët e frymëmarrjes. Toksina e difterisë mund të prekë edhe zemrën dhe sistemin nervor, duke sjellë komplikacione serioze.
Infeksioni përhapet zakonisht përmes kontaktit të afërt me një person të infektuar dhe, më rrallë, nëpërmjet objekteve të ndotura me sekrecione.
Vaksinimi i rregullt ka bërë që difteria të jetë sot një sëmundje shumë e rrallë në Itali. Të dhënat e Institutit të Lartë të Shëndetësisë tregojnë se gjatë vitit 2022 u identifikuan tre raste të C. diphtheriae toksigjene, të gjitha të importuara.
Dy prej tyre ishin raste të difterisë kutane, ndërsa rasti tjetër kishte shenja si në sistemin e frymëmarrjes, ashtu edhe në lëkurë.
Pavarësisht rrallësisë së saj, difteria mbetet një kërcënim i rëndësishëm për njerëzit që nuk janë vaksinuar.
