Gjatë vizitës së tij në SHBA, kryeministri i Kosovës, Albin Kurti, është takuar në New York me Princin e Kurorës së Kuvajtit, Sheikh Sabah Khaled Al-Hamad Al-Sabah. Takimi u zhvillua në kuadër të punimeve të sesionit të 81-të të Asamblesë së Përgjithshme të OKB-së.
Të lidhura
None found
Sipas Kurtit, biseda u përqendrua te zgjerimi i marrëdhënieve ndërmjet Kosovës dhe Kuvajtit, me theks të veçantë në ekonomi, investime dhe mbrojtje.
Palët shprehën vullnetin për të avancuar marrëveshjet që lidhen me bashkëpunimin ekonomik, shmangien e tatimit të dyfishtë dhe mbrojtjen e investimeve. Kryeministri kërkoi edhe përkrahjen e Kuvajtit që Kosova të anëtarësohet si vëzhguese në Organizatën e Bashkëpunimit Islamik.
Në postimin e tij për takimin, Kurti e cilësoi të përzemërt bisedën me Princin e Kurorës së Shtetit të Kuvajtit, Shkëlqesinë e Tij Sheikh Sabah Khaled Al-Hamad Al-Sabah.
Ai kujtoi se miqësia ndërmjet dy vendeve u krijua në rrethana të vështira. Në vitin 1999, kur populli i Kosovës po dëbohej me dhunë nga shtëpitë, një nismë televizive në Kuvajt arriti të grumbullonte shtatë milionë dollarë brenda vetëm një dite për Kosovën, ndërsa Emiri i ndjerë kontribuoi personalisht me një milion dollarë.
Kurti theksoi se Kuvajti, duke e njohur nga përvoja agresionin dhe okupimin, humbjen e lirisë dhe rifitimin e saj me ndihmën e aleatëve, e kishte kuptuar shpejt dhe drejt situatën e Kosovës. Ai nënvizoi se ky solidaritet nuk harrohet.
Gjatë takimit, Princi i Kurorës e falënderoi Republikën e Kosovës për mbështetjen në përballjen me ekstremizmin në rajonin e Gjirit. Po ashtu, u diskutua për angazhimin e Forcës së Sigurisë së Kosovës në misionin paqeruajtës në Kuvajt, si pjesë e Gardës Kombëtare të Iowa-s.
Kryeministri rikujtoi se më 11 tetor 2011, Kuvajti e njohu Republikën e Kosovës si shteti i 82-të në botë. Ai shtoi se këtë muaj bëhen 15 vjet nga vendosja e marrëdhënieve diplomatike ndërmjet dy shteteve.
Sipas Kurtit, Kuvajti e ka mbështetur Kosovën gjatë gjithë kësaj periudhe në përpjekjet për t’u përfshirë në organizata ndërkombëtare. Për këtë përkrahje të vazhdueshme dhe me vlerë, ai i përcolli Princit të Kurorës mirënjohjen e popullit të Kosovës.
Kurti deklaroi se tani duhet ndërmarrë një hap i ri i rëndësishëm, duke e shndërruar miqësinë në një partneritet konkret për zhvillimin ekonomik. Të dyja palët shprehën gatishmëri për nënshkrimin e memorandumit për Komisionin e Përbashkët për Bashkëpunim, i cili synon t’u hapë mundësi të reja marrëdhënieve dhe t’u krijojë atyre një kornizë të qëndrueshme.
Gjithashtu, u arrit pajtimi që së shpejti të përmbyllen marrëveshja për shmangien e tatimit të dyfishtë dhe ajo për mbrojtjen e investimeve.
Në takim u kërkua edhe mbështetja e Kuvajtit për t’i siguruar Kosovës statusin e vëzhguesit në Organizatën e Bashkëpunimit Islamik.
Kurti e lidhi nevojën dhe gatishmërinë e përbashkët për bashkëpunim ekonomik më të gjerë e më të thellë me përparimin e Kosovës në fusha kyçe, përfshirë teknologjinë e informacionit dhe industrinë e mbrojtjes. Sipas tij, të rinjtë dhe kompanitë kosovare po dëshmojnë çdo ditë se Kosova është vend i talentit, punës dhe mundësive.
Në përmbyllje, Kurti e përshkroi rrugëtimin e marrëdhënieve dypalëshe si kalim nga solidariteti i vitit 1999 drejt partneritetit të së ardhmes, duke i cilësuar Kosovën dhe Kuvajtin miq të vërtetë.
