Gjenerata Z është bërë e njohur për prirjen e saj për t’i konsideruar të tejkaluara shumë gjëra që dikur ishin krejt të zakonshme. Qëndrimi i saj i fundit ndaj makinave me benzinë mund të jetë ndër më polemikët deri më tani.
Të lidhura
None found
Sipas një sondazhi të ri, një në katër të rinj beson se zotërimi i një makine me benzinë është po aq i vjetruar sa mbajtja e një telefoni fiks.
Studimi, i porositur nga kompania E.ON Next, përfshiu 1 mijë e 500 shoferë të rinj dhe shqyrtoi pikëpamjet e tyre për automjetet elektrike dhe ato me benzinë.
Të dhënat treguan se 55 për qind e të anketuarve do të donin që automjeti i tyre i parë të ishte elektrik.
Kostoja u rendit si arsyeja kryesore për këtë preferencë, e përmendur nga 20 për qind e pjesëmarrësve. Në vendin e dytë u pozicionua mundësia për karikim të lehtë në shtëpi, me 19 për qind.
Një në pesë të rinj deklaroi se nuk e imagjinon veten të ngasë ndonjëherë një makinë me benzinë. Ndërkohë, pothuajse dy të tretat mendojnë se makinat me benzinë dhe naftë do të zhduken brenda jetës së tyre.
Rreth 24 për qind thanë se nuk do të blinin një automjet të ri me benzinë ose naftë, ndërsa 53 për qind besojnë se brezi i tyre do të jetë i fundit që do t’i përdorë rregullisht këto kategori makinash.
Për sondazhin, E.ON Next pyeti 1 mijë e 500 britanikë nga 17 deri në 20 vjeç lidhur me qëndrimet e tyre ndaj makinave elektrike dhe atyre me benzinë.
Eksperti i automjeteve elektrike, Robert Llewellyn, tha se të rinjtë nuk po rriten më me idenë se makina e parë duhet patjetër të jetë me benzinë.
“Ky brez nuk po rritet me supozimin se makina e parë do të jetë me benzinë”, tha ai.
“Ata po shohin se çfarë është në dispozicion sot dhe po bëjnë një zgjedhje praktike.”
“Sot ka më shumë makina elektrike për të zgjedhur se kurrë më parë, ka mënyra më të përballueshme për t’i blerë dhe ekziston mundësia për t’i mbajtur kostot e përdorimit më të ulëta duke i karikuar në shtëpi.”
“Për shumë shoferë të rinj, kalimi në makinë elektrike nuk është një deklaratë për të ardhmen. Është thjesht alternativa që ka më shumë kuptim sot.”
Gráinne Regan, drejtoreshë për ofertat dhe produktet në E.ON Next, vlerësoi se prirja e shoferëve të rinj drejt automjeteve elektrike po bëhet gjithnjë më e dukshme.
“Më shumë se gjysma e shoferëve të rinj duan që makina e tyre e parë të jetë elektrike dhe duket qartë se mund të kenë arsye të forta për këtë.”
“Me kursime deri në 890 paundë gjatë vitit të parë krahasuar me karburantin dhe me mundësinë për karikim gjatë natës në shtëpi për vetëm 8 paundë, makina elektrike po bëhet gjithnjë e më e qasshme për gjeneratën e ardhshme të shoferëve”, tha ajo.
Këto shifra mund të duken të papritura, veçanërisht pas një sondazhi tjetër të kohëve të fundit, i cili zbuloi se shumë pjesëtarë të Gjeneratës Z ndiejnë frikë edhe nga vetë vozitja.
Ekspertët e Tempcover i pyetën të rinjtë se cilat veprime të zakonshme që lidhen me makinën u shkaktojnë më shumë ankth. Ndërrimi i gomës së shpuar doli të ishte shqetësimi më i madh.
Edhe parkimi paralel, nisja në përpjetë dhe hyrja në autostradë u renditën mes situatave që u krijojnë ankth shumë shoferëve të rinj.
Rezultatet nuk pritet t’i habisin përdoruesit e rinj të TikTok-ut, pasi shumë prej tyre ndajnë rregullisht në këtë platformë frikërat që lidhen me vozitjen.
“Kur papritur fillon paniku sepse duhet të shkosh me makinë në një vend të ri dhe nuk e di si është situata me parkimin”, shkroi përdoruesja @artemis_alexis.
Ndërkaq, @romillyjane publikoi një video nga makina e saj, duke thënë: “Njerëzit gjithmonë mendojnë se po dramatizoj, por kjo është e tmerrshme. E urrej, e urrej, e urrej.”
Edhe @loulroberts rrëfeu frikën që i shkakton autostrada.
“Asnjëherë nuk kam qenë as afër një autostrade. Edhe nëse jam në një rrethrrotullim dhe një nga daljet të çon në autostradë, më kap paniku”, tha ajo. /GazetaExpress/
Frikërat më të mëdha të Gjeneratës Z gjatë vozitjes
Ndërrimi i një gome të shpuar – 36 për qind
Ndezja e makinës me kabllo kur bateria është shkarkuar – 36 për qind
Parkimi paralel – 24 për qind
Kontrollimi i presionit të gomave në pompë dhe mbushja e tyre me ajër – 22 për qind
Nisja në përpjetë – 22 për qind
Kontrollimi i nivelit të vajit – 20 për qind
Telefonata te kompania e sigurimit apo paraqitja e një kërkese për dëmshpërblim – 19 për qind
Vozitja në autostradë – 18 për qind
Hyrja dhe bashkimi me trafikun në autostradë – 18 për qind
Telefonata te shërbimi i asistencës rrugore – 18 për qind
