Qytetarët pritet të rikthehen sot në sheshet e Tiranës, teksa protesta kundër qeverisë arrin ditën e saj të 98-të. Ata do të vijojnë aksionin dhe kërkesën që kryeministri Edi Rama të japë dorëheqjen.
Të hënën shënohen 100 ditë nga fillimi i protestave, duke e çuar qëndresën e përditshme drejt një tjetër momenti të rëndësishëm. Për këtë ditë është paralajmëruar një mobilizim më i gjerë, ndërsa qytetarëve nga e gjithë Shqipëria u është bërë thirrje të marrin pjesë në tubimin në kryeqytet.
Të lidhura
None found
Edhe dita e 97-të e protestës u shoqërua me disa zhvillime. Tubimi i së premtes nisi paradite përpara Gjykatës Penale, ku qytetarët shprehën mbështetjen për protestuesit e arrestuar pas tensioneve të 1 shtatorit përpara Kryeministrisë.
Gjykata vendosi të lironte 14 protestuesit e arrestuar. Aktivistët e konsideruan vendimin një fitore, duke theksuar se ndalimet nuk do ta ndalin protestën dhe se aksioni do të vijojë.
Në orët e mbrëmjes, protestuesit u grumbulluan përsëri në sheshin “Skënderbej”, prej nga marshuan drejt Kryeministrisë.
Gjatë marshimit u dëgjuan thirrjet “Rama jep dorëheqjen” dhe “Arrestoni Ramën”, ndërsa në pankarta përcilleshin mesazhe kundër qeverisë dhe në përkrahje të personave të arrestuar gjatë ditëve të fundit.
Pas fjalimeve të mbajtura përpara Kryeministrisë, qytetarët e vazhduan protestën duke marshuar në bulevard dhe nëpër rrugët e kryeqytetit. Ata përsëritën kërkesën për largimin e Ramës dhe paralajmëruan se tubimet do të vazhdojnë.
Një pjesë qendrore e fjalimeve iu kushtua protestës së paralajmëruar për të hënën. Aktivistët kërkuan pjesëmarrje masive në ditën e 100-të dhe njoftuan rrethimin e Kryeministrisë.
Përveç dorëheqjes së Ramës, protestuesit kanë kërkuar edhe largimin e qeverisë dhe ngritjen e një qeverie teknike.
Aksioni pritet të zhvendoset gjithashtu përpara Parlamentit, pas rifillimit të sesionit parlamentar. Kuvendi nis punimet të martën, më 8 shtator, një ditë pas protestës së 100-të, çka paralajmëron një fillim jave me tension të lartë politik.
