Maqedonia mund ta rrisë ndjeshëm efikasitetin e prodhimit të saj të energjisë elektrike nëse investon pa vonesë në teknologjitë e ruajtjes përmes baterive. Kjo do të mundësonte grumbullimin e energjisë në momentet kur ajo kushton më pak, për ta përdorur ose eksportuar më pas, kur kërkesa dhe çmimet në treg janë më të larta.
Të lidhura
None found
Vlerësimi u bë nga ish-zëvendëskryeministri dhe kryetari i Shoqatës Maqedonase të Energjisë, Koço Angjushev, gjatë një interviste për “Bloomberg Adria”.
“Bullgaria ka vepruar shumë mirë në këtë drejtim dhe ka siguruar përfitime të konsiderueshme financiare. Edhe Maqedonia mund ta ndjekë këtë shembull, ndaj duhet ta shfrytëzojë këtë mundësi, të mos e humbasë atë dhe të ndërhyjë shpejt në këtë sektor”, deklaroi Angjushev.
Rëndësia e sistemeve të baterive po shtohet paralelisht me zgjerimin e prodhimit nga termocentralet fotovoltaike. Në orët kur impiantet diellore gjenerojnë sasi të mëdha energjie, në treg mund të krijohen teprica të konsiderueshme, të cilat ndikojnë në uljen e çmimeve.
Energjia që mbetet tepricë nuk do të ishte e nevojshme të shitej menjëherë me tarifa të ulëta. Ajo mund të depozitohej në bateri dhe të vihej në përdorim në një fazë të mëvonshme, kur kërkesa rritet dhe çmimi është më i favorshëm.
Angjushev theksoi se një mekanizëm i tillë do të ishte i dobishëm jo vetëm për investuesit në burimet e rinovueshme. Bateritë mund të ndihmojnë gjithashtu në stabilizimin dhe balancimin më të mirë të sistemit elektroenergjetik, duke ulur kostot që lidhen me këtë proces.
