Ish-kryeministri izraelit Ehud Barak e cilësoi si një budallallëk përshkallëzimin e qëllimshëm të tensioneve me Turqinë, duke e sulmuar ashpër pasardhësin e tij, Benjamin Netanyahu.
Të lidhura
None found
Barak tha se Netanyahu nuk po vepron i udhëhequr nga interesat e sigurisë së Izraelit, por nga nevoja për të ruajtur mbijetesën politike. Sipas tij, kryeministri sillet si “një kumarxhi i fiksuar pas fatit”, ndërsa vendimet e tij të pamatura po shqetësojnë thellësisht aleatët dhe miqtë e paktë që Izraelit i kanë mbetur në botë dhe në rajon.
Ai vlerësoi se hapat e ndërmarrë nga Netanyahu krijojnë një motiv të fortë politik për të shkuar drejt zgjedhjeve, duke prodhuar një varg krizash sigurie që mund të shtojnë ankthin e opinionit publik. Në të njëjtën kohë, Barak nënvizoi se Turqia nuk është “as Irani dhe as Siria e Assadit”, ndaj çështjet me Ankaranë mund të menaxhohen përmes diplomacisë.
“Nuk ka asnjë problem strategjik me Turqinë që nuk mund të zgjidhet, zbutet ose shtyhet në planin afatgjatë përmes kontakteve diskrete, të koordinuara me SHBA-në, si dhe përmes ndikimit amerikan në Turqi dhe Siri. Netanyahu ka dalë plotësisht nga binarët”, tha Barak.
Ish-kryeministri shtoi se sjellja e kreut të qeverisë izraelite po alarmon në mënyrë të thellë aleatët dhe miqtë e paktë të mbetur të vendit, si në arenën ndërkombëtare, ashtu edhe në rajon.
