Deri në fund të këtij shekulli, zjarret pyjore mund të përfshijnë 39% më shumë territor europian, edhe nëse bota arrin skenarin më optimist për kufizimin e ngrohjes globale. Përfundimi vjen nga një studim i fundit, i cili thekson se menaxhimi më i mirë i zjarreve mund ta ngadalësojë, por jo ta ndalë këtë prirje.
Të lidhura
None found
Temperaturat ekstreme, thatësira dhe erërat e forta po krijojnë kushte ku edhe vatrat e vogla mund të shndërrohen me shpejtësi në zjarre të fuqishme. Sipas skenarit më të rëndë të analizuar nga studiuesit, në të cilin ngrohja globale do të arrinte 3.6°C mbi nivelet paraindustriale, sipërfaqja e djegur do të rritej pothuajse trefish.
Megjithatë, investimet në menaxhimin e zjarreve mund ta ulin këtë rritje me më shumë se 70%, edhe pse nuk do të jenë në gjendje ta zhdukin plotësisht atë. “Investimet në menaxhimin e zjarreve mund të ndihmojnë deri në një pikë, por nëse vazhdojmë në një rrugë me emetime të larta, përsëri do të shohim rritje të mëdha të sipërfaqes së djegur”, deklaroi Maik Billing, studiues i ekosistemeve në Institutin e Potsdamit për Kërkimin e Ndikimit Klimatik (PIK) dhe autori kryesor i studimit.
“Menaxhimi i zjarreve nuk mund të zëvendësojë masat për frenimin e ndryshimeve klimatike.” Studimi publikohet ndërsa zjarret vijojnë të godasin zona të ndryshme të Europës. Pas javësh me vatra të mëdha në Francë, Spanjë, Itali, Kroaci dhe Greqi, flakët kanë prekur edhe vende të Europës veriore, mes tyre Britaninë e Madhe, Belgjikën dhe Gjermaninë.
Të dhënat e publikuara sot nga Shërbimi Evropian i Informacionit për Zjarret në Pyje tregojnë se sezoni i këtij viti në të gjithë BE-në pritet të jetë i treti më i rëndë i regjistruar, pas atyre të viteve 2025 dhe 2022. Deri tani, zjarret kanë përfshirë më shumë se 600,000 hektarë, ndërsa Belgjika, Franca dhe Sllovakia kanë regjistruar rekorde për këtë periudhë të vitit.
