Përplasja mes Shteteve të Bashkuara dhe Iranit në Lindjen e Mesme po hyn në një fazë të re përshkallëzimi. Ushtria iraniane deklaroi se ka lëshuar raketa ndaj bazës amerikane Sheikh Isa në Bahrein, duke pretenduar dëmtimin e një depoje karburanti dhe të zonave ku janë vendosur avionët luftarakë amerikanë.
Të lidhura
None found
Autoritetet lokale raportuan ndërkohë sulme të tjera iraniane në Kuvajt dhe Bahrein. Nga ana tjetër, Komanda Qendrore e SHBA-së njoftoi për përfundimin e natës së shtatë me radhë të goditjeve kundër Iranit. Sipas saj, objektivat e sulmuara përfshijnë qendra vëzhgimi, infrastrukturë logjistike, depo nëntokësore armësh dhe kapacitete detare.
Gjatë sulmeve iraniane ndaj bazave amerikane në Jordani, të paktën katër ushtarë amerikanë kanë mbetur të plagosur. Gjendja e tyre shëndetësore nuk është bërë publike.
Situata është tensionuar ndjeshëm edhe në Gjirin e Hormuzit. Garda Revolucionare iraniane tha se ka ndaluar disa cisterna që tentuan të kalonin nëpër ngushticë. Më herët, Teherani kishte njoftuar se dy anije ishin përfshirë nga flakët teksa kalonin në një zonë të minuar, por Komanda Qendrore amerikane e hodhi poshtë këtë deklaratë, duke e cilësuar të rremë.
E premtja shënoi një javë sulmesh ajrore të pandërprera amerikane kundër Iranit, të rinisura pas dështimit të bisedimeve të paqes mes dy vendeve.
Ndërkohë, pasiguria për të ardhmen e Ngushticës së Hormuzit ka komplikuar përpjekjet për një armëpushim të qëndrueshëm. Garda Revolucionare Islamike e Iranit deklaroi mbylljen e kësaj rruge detare strategjike, pretendim që kundërshtohet nga Komanda Qendrore e Ushtrisë amerikane. Kjo e fundit theksoi se forcat amerikane vijojnë shoqërimin e trafikut tregtar në këtë korridor jetik për transportin global të energjisë.
