Forcat e policisë në Sarandë po vazhdojnë operacionin për gjetjen dhe arrestimin e autorëve të atentatit ndaj Thimjo Rubatit, i cili u qëllua me armë zjarri në qytet.
Informacionet paraprake tregojnë se, menjëherë pas sulmit, të dyshuarit janë larguar me motor nga rruga “Mitat Hoxha” drejt varrezave të qytetit, në lagjen e njohur si “Baba Rexhepi”. Dyshohet se pikërisht në këtë zonë u janë humbur gjurmët.
Të lidhura
None found
Kërkimet e policisë po vështirësohen nga pozicioni periferik i zonës, e cila vijon më tej në një terren bregdetar të thepisur.
Krahas kontrolleve në tokë, operacioni pritet të zgjerohet edhe në hapësirën detare, me synim lokalizimin dhe kapjen e personave të dyshuar.
Ndërkohë, grupet hetimore po punojnë për të sqaruar plotësisht rrethanat e atentatit dhe për të identifikuar të gjithë personat e përfshirë.
