Deklaratat e fundit të zyrtarëve serbë kanë nxitur një reagim të fortë nga Këshilli i Ambasadorëve Shqiptarë, i cili i konsideron ato shprehje të një retorike shoviniste që kërcënon stabilitetin në rajon.
Sipas Këshillit, rikthimi i gjuhës së urrejtjes dhe i narrativave të së kaluarës kërkon përgjigje diplomatike nga Shqipëria, si dhe vëmendje nga institucionet ndërkombëtare.
Të lidhura
None found
Këshilli i Ambasadorëve Shqiptarë dënon prerazi qëndrimet e fundit të një ministreje të Qeverisë së Serbisë, pasi ato risjellin në debatin publik koncepte të lidhura me spastrimin etnik të shqiptarëve. Një retorikë e tillë është në kundërshtim me vlerat evropiane dhe vë në rrezik qëndrueshmërinë rajonale.
Këto qëndrime vijnë pas një vargu deklaratash që relativizojnë politikat e ndjekura në të kaluarën. Ato shtojnë shqetësimet se Serbia ende nuk është shkëputur plotësisht nga ideologjia që shkaktoi luftëra dhe krime në ish-Jugosllavi.
KASH sjell gjithashtu në vëmendje diskriminimin e shqiptarëve në Luginën e Preshevës, përfshirë pasivizimin masiv të adresave, i cili konsiderohet një genocid modern.
Duke nënvizuar se pavarësia e Kosovës përbën një realitet të pakthyeshëm, Këshilli i Ambasadorëve Shqiptarë i kërkon Shqipërisë të ndërmarrë një demarsh diplomatik ndaj ambasadës serbe në Tiranë. Njëkohësisht, në bashkërendim me Kosovën, Tirana duhet ta parashtrojë këtë çështje pranë BE-së, NATO-s dhe partnerëve strategjikë.
Për Ballkanin nevojitet një udhëheqje e përgjegjshme, zbatim i së drejtës ndërkombëtare dhe marrëdhënie të mira fqinjësore, e jo rikthimi te gjuha e urrejtjes.
