Albin Kurti, kryeministër në detyrë, ka thënë se Ylli, Agron dhe Mehmet Bytyqi janë një provë e drejtpërdrejtë e krimeve që shteti serb ka kryer ndaj shqiptarëve, ndërsa mungesa e drejtësisë për vrasjen e tyre, sipas tij, vazhdon të mbetet një peshë e rëndë.
Të lidhura
None found
Në një mbledhje përkujtimore të organizuar të enjten në mbrëmje në ballkonin e kryeministrisë, me rastin e 27-vjetorit të vrasjes së tyre, Kurti u shpreh se rrëfimi i tre vëllezërve është një histori atdhedashurie, sakrifice dhe përkushtimi për lirinë.
Ai rikujtoi se Ylli, Agroni dhe Mehmeti, të lindur në Shtetet e Bashkuara të Amerikës, iu bashkuan Ushtrisë Çlirimtare të Kosovës në kuadër të njësitit vullnetar “Atlantiku”. Sipas tij, pas mbarimit të luftës ata u arrestuan nga policia serbe dhe më pas u vranë nga aparati shtetëror serb, edhe pse e kishin vuajtur dënimin prej 15 ditësh burg. Trupat e tyre u zbuluan në vitin 2001 në varrezën masive në Petrovo Sello, në serbi, së bashku me trupat e shqiptarëve të tjerë të vrarë nag serbët gjatë luftës së Kosovës.
“Vëllezërit Bytyqi janë dëshmia e qartë e krimeve të Serbisë ndaj shqiptarëve dhe në të njëjtën kohë e mungesës së plotë të vullnetit të Serbisë për të dhënë përgjegjësi për krimet e kryera”, tha Kurti.
Ai theksoi se kalimi i viteve nuk e pakëson aspak obligimin për drejtësi.
“ Përkundrazi, çdo vit që kalon e bën edhe më të rëndë barrën e pandëshkueshmërisë”, deklaroi ai.
Kurti nënvizoi se Kosova do të vazhdojë të kërkojë sqarimin e plotë të këtij rasti dhe dënimin e përgjegjësve, duke kujtuar se edhe Shtetet e Bashkuara të Amerikës kanë kërkuar vazhdimisht drejtësi për këtë krim.
Ai përmendi gjithashtu edhe domethënien simbolike që vëllezërit Bytyqi kanë në marrëdhëniet ndërmjet Kosovës dhe SHBA-së.
“Vëllezërit Bytyqi e lidhnin në mënyrë të veçantë Republikën e Kosovës, kombin shqiptar, me Shtetet e Bashkuara të Amerikës. Ata ishin shqiptarë dhe amerikanë. Bij të Kosovës dhe qytetarë të Amerikës. Në jetën dhe sakrificën e tyre bashkoheshin dy vende të lidhura me miqësi historike dhe me përkushtimin ndaj lirisë”, deklaroi Kurti.
Në përmbyllje të fjalës së tij, ai tha se Qeveria e Kosovës do ta vazhdojë angazhimin për të kërkuar të vërtetën dhe drejtësinë për vëllezërit Bytyqi, duke këmbëngulur që para drejtësisë të dalin si urdhërdhënësit, ashtu edhe ekzekutorët e vrasjes së tyre.
