Juventusi mund të ndahet nga talenti i ri Kenan Yildiz për të përmirësuar gjendjen financiare, ndërsa Arsenali përmendet si skuadra që prin në garën për sulmuesin turk në merkaton e verës.
Gianluca Di Marzio, gazetar i Sky Italia, thotë se klubi italian ka nevojë të sigurojë shuma të konsiderueshme përmes shitjeve të futbollistëve. Kjo nevojë e bën të pasigurt të ardhmen e Yildizit në Torino.
Të lidhura
None found
“Yildiz mund të jetë një marrëveshje për verën, sepse Juventusi duhet të shesë një lojtar ose të arkëtojë 70-80 milionë euro nga tregu i transferimeve. Mund të shesë tre apo katër lojtarë së bashku, ose vetëm një”, u shpreh Di Marzio për wettfreunde.net.
Juventusi, sipas gazetarit, po merr parasysh edhe largimin e talentit turk. Në këtë kontekst përmendet transferimi i Alajbegovicit, i cili lidhet me planet e klubit për një rol të ngjashëm në të ardhmen.
Arsenali dhe Tottenham Hotspur janë interesuar për Yildizin. Di Marzio bëri të ditur se gjatë verës të dy klubet kishin pyetur Juventusin për çmimin e tij dhe ishin të gatshme të ofronin mbi 100 milionë euro, nëse bardhezinjtë do të pranonin të hynin në bisedime.
Nëse Juventusi vendos ta nxjerrë në shitje, vlera e futbollistit mund të shkojë në rreth 150 milionë euro.
“Nëse Juventusi e shet Yildizin, ai do të vlerësohet rreth 150 milionë euro. Mendoj se Arsenali është njëri prej klubeve më të interesuara për të. Edhe Tottenhami, por besoj se Arsenali do ta udhëheqë garën”, deklaroi Di Marzio.
Yildiz renditet ndër talentet më të çmuara të Juventusit. Një transferim i mundshëm i tij do të ishte ndër lëvizjet më të bujshme të afatit kalimtar të verës, nëse palët pajtohen për një shifër kaq të lartë.
