Koncerti i Kanye West në Tiranë ka marrë jehonë edhe jashtë vendit, në një moment kur Shqipëria prej 39 ditësh është përfshirë nga protesta të mëdha. Në një analizë, revista gjermane Der Spiegel e vendos këtë aktivitet në sfondin e tensionit politik në vend, duke vënë në dukje se si kryeministri Edi Rama, ashtu edhe Kanye West, prej vitesh janë përballur me debate dhe kritika të shumta publike.
Sipas medias gjermane, “Rama dhe Kanye West kanë ditur prej vitesh të tërheqin vëmendjen. Sot, të dy ndodhen në mes të kritikave”.
Të lidhura
None found
Teksa dhjetëra mijëra qytetarë vijojnë të protestojnë prej javësh në Shqipëri, duke e akuzuar Ramën për korrupsion, autoritarizëm dhe afërsi me Donald Trump, artikulli thekson se Kanye West mbetet gjithashtu një emër kontrovers në nivel ndërkombëtar për shkak të deklaratave të tij antisemite, të cilat e kanë bërë të padëshiruar në disa shtete.
Në qendër të diskutimit qëndron koncerti i planifikuar për të shtunën në periferi të Tiranës. Der Spiegel shkruan se qeveria shqiptare ka vendosur të mbulojë këtë aktivitet me më shumë se 4 milionë euro, ku përfshihet edhe ngritja e një arene të përkohshme.
Media gjermane citon edhe kryeministrin Rama, sipas të cilit fondet u miratuan “në minutën e fundit” për të shmangur, siç u shpreh ai, dëmtimin e imazhit të Shqipërisë përballë rreth 25 mijë vizitorëve nga afro 80 vende, të cilët i kishin blerë tashmë biletat e koncertit.
Sipas Ramës, ky event pritet të sjellë “të paktën” 100 milionë euro të ardhura për ekonominë shqiptare, kryesisht nga shtimi i rezervimeve në hotele dhe nga aktiviteti turistik.
Megjithatë, Der Spiegel thekson se vendimi për të financuar koncertin ka shkaktuar reagime të forta në një periudhë kur protestat kundër qeverisë vazhdojnë prej më shumë se një muaji. Artikulli kujton se Rama prej vitesh ka promovuar investimet e huaja në Shqipëri, por protestuesit, kryesisht të rinj, e akuzojnë atë se po i jep përparësi interesave private në dëm të pasurive publike.
Sipas medias gjermane, një tjetër çështje që ka rritur zemërimin e qytetarëve është projekti për ngritjen e një resorti luksoz nga Jared Kushner, dhëndri i presidentit amerikan Donald Trump, në një zonë të mbrojtur natyrore në bregdetin shqiptar. Në analizë, debati rreth koncertit të Kanye West paraqitet si një simbol i përplasjes më të gjerë politike mbi mënyrën se si qeveria shqiptare menaxhon fondet publike dhe projektet e mëdha të investimeve.
