Gjykata e Apelit në Paris ka konfirmuar dënimin për mashtrim ndaj Marine Le Pen, drejtuese e partisë së ekstremit të djathtë Partia Nacionale (RN), në një vendim që mund të vërë në pikëpyetje pjesëmarrjen e saj në zgjedhjet presidenciale të Francës në vitin 2027.
Të lidhura
None found
Sipas vendimit, Le Pen është ndaluar për 15 muaj të ushtrojë funksione publike, ndërsa masa përfshin edhe një vit me vendosjen e një pajisjeje elektronike monitorimi.
Hetimi ka të bëjë me pretendimet se fonde të Parlamentit Europian janë përdorur për të shlyer pagesat e stafit të partisë së saj në Francë, në vend që këta persona të ushtronin rolin e asistentëve parlamentarë.
Në gjykimin e parë, Marine Le Pen së bashku me 24 të tjerë, mes tyre ish-eurodeputetë, asistentë dhe kontabilistë, u deklaruan fajtorë për një skemë që gjykata tha se ishte zbatuar gjatë viteve 2004-2016.
Vendimi fillestar ndaj saj parashikonte një ndalim pesëvjeçar nga mbajtja e posteve publike, si edhe një dënim me katër vite burg, ku dy prej tyre ishin të pezulluara.
Gjatë shqyrtimit në apel, Le Pen ka mohuar që Partia Nacionale të kishte ngritur një mekanizëm për përvetësimin e fondeve europiane, duke këmbëngulur se partia kishte vepruar në “mirëbesim të plotë”.
Ajo e ka përshkruar këtë proces si një “gjueti shtrigash” kundër saj dhe forcës së saj politike, ndërsa disa nga mbështetësit e saj kanë dërguar kërcënime ndaj gjyqtarëve.
Nga ana tjetër, prokurorët kanë pretenduar se pasi mori drejtimin e partisë nga babai i saj Jean-Marie Le Pen në vitin 2011, Marine Le Pen e shndërroi këtë praktikë të përdorimit të fondeve europiane në një sistem të organizuar.
Ky vendim i Gjykatës së Apelit vjen në një fazë të rëndësishme për politikën në Francë, duke qenë se Marine Le Pen konsiderohej një nga emrat kryesorë në garën për zgjedhjet presidenciale të vitit 2027. Në rast se asaj i pamundësohet kandidimi, partia e saj ka si alternativë liderin e ri Jordan Bardella.
