Sot në të gjithë Shtetet e Bashkuara të Amerikës po zhvillohen aktivitete për 250-vjetorin e Pavarësisë.
Të lidhura
None found
Në Uashington DC, Dita e Pavarësisë po shënohet me fishekzjarrë masivë, një fluturim të avionëve luftarakë dhe një tubim të presidentit Donald Trump.
Edhe në Nju Jork, Filadelfia dhe Los Angeles janë planifikuar koncerte festive, ku do të ngjiten në skenë emra të njohur të muzikës.
Mesazhi i parë për këtë përvjetor u dha nga zëvendëspresidenti JD Vance, i cili gjatë një fjalimi në Nju Jork falënderoi presidentin Donald Trump. “Sot festojmë 250 vjet Amerikë, duke u përballur me të ardhmen pa frikë. Festojmë 250 vjet, duke provuar se çfarë mund të arrijë një popull i lirë”, deklaroi Vance përpara marinarëve, oficerëve të policisë, punonjësve të emergjencave të SHBA-së, si edhe dhjetëra shefave të marinës që po vizitojnë vendin nga e gjithë bota.
Gjatë fjalës së tij, Vance lexoi paragrafin e dytë të Deklaratës së Pavarësisë, ku thuhet: “Ne i konsiderojmë këto të vërteta si provë se të gjithë njerëzit janë krijuar të barabartë, se ata janë të pajisur nga krijuesi i tyre me të drejta të caktuara të patjetërsueshme dhe midis këtyre të drejtave janë jeta, liria dhe ndjekja e lumturisë.”
Megjithatë, një pjesë e aktiviteteve të parashikuara janë ndërprerë, pasi meteorologët kanë paralajmëruar temperatura jashtëzakonisht të larta dhe stuhi, ndërsa një valë vape përvëluese ka përfshirë zona të SHBA-së lindore dhe qendrore. Shumë ngjarje në të gjithë vendin janë anuluar, ndërsa të tjera janë shtyrë për më vonë gjatë ditës.
Mbrëmjen e kaluar, në një fjalim të mbajtur në malin ikonik Rushmore, Presidenti i SHBA-së Donald Trump e përshkroi këtë festë si “një nga ditët më të jashtëzakonshme në historinë e botës”. Ai u shpreh gjithashtu se “identiteti amerikan është nën një sulm të ri”, duke shtuar se “ka pasur një përpjekje të pamohueshme… për të na rrëzuar shpirtin amerikan”.
