Përmes një postimi në llogarinë e tij personale në “Facebook”, Presidenti i Republikës, Bajram Begaj, ka reaguar për hapjen e grupkapitullit të katërt në Konferencën Ndërqeveritare Shqipëri-BE, e mbajtur sot në Bruksel.
Ky grupkapitull përfshin sektorë kyç të Marrëveshjes së Gjelbër Evropiane, duke u konsideruar një hap me rëndësi të veçantë në procesin e integrimit të vendit.
Kreu i Shtetit, e ka cilësuar këtë zhvillim si një tregues të qartë të përparimit që po bën Shqipëria në rrugën drejt anëtarësimit të plotë në Bashkimin Evropian.
Gjithashtu, Begaj shprehu bindjen se dinamika e deritanishme, do të mundësojë që deri në fund të vitit të hapen të gjithë kapitujt e negociatave me BE.
“Një tjetër hap shumë i rëndësishëm në procesin e anëtarësimit të plotë evropian. Sot Shqipëria hapi negociatat për grupkapitullin 4: Agjenda e Gjelbër & Lidhshmëria e Qëndrueshme. Me këtë ritëm, Shqipëria drejt realizimit të objektivit të saj për të hapur gjithë grupkapitujt e negociatave brenda vitit”, u shpreh Presidenti Begaj në mesazhin e tij.
