Zëdhënësja e PD për Anti-Korrupsionin, Genta Vangjeli ka denoncuar se kompani të personave të arrestuar gjatë operacionit ‘Coast to coast’, marrin fonde nga paratë publike.
Në një deklaratë për shtyp ajo sqaroi se kompania Xpert systems shpk, për periudhën 2019-2024 ka përfituar 1.6 milion euro nga institucione shtetërore përfshirë Drejtorinë Rajonale Tatimore Tiranë, Shërbimin e Kontrollit të Brendshëm në MB, Drejtorinë e Policisë Vendore Elbasan, Gjykata e Rrethit Tiranë, Kolegji i Posaçëm i Apelimit, Autoriteti Kombëtar për Certifikimin Elektronik dhe Sigurinë Kibernetike etj.
Ndërkohë kompania tjetër, ‘INFORMATION BUSINESS SYSTEMS –IBS shpk’, sipas PD, ka përfituar 463 mijë euro nga Drejtoria e Përgjithshme e Parandalimit e Pastrimit te Parave, Aparati i Drejtorisë së Policisë, Prokuroria e Posaçme Kundër Korrupsionit dhe Krimit të Organizuar etj.
“Partia Demokratike kërkon nga institucionet shtetërore përgjegjshmëri në menaxhimin e fondeve publike të shqiptarëve duke hequr dorë nga dy standardet e zakonshme ku me njërën dorë e dënojnë krimin e më tjetrën vijojnë ta ushqejnë atë me para publike”, përfundoi Vangjeli.
Deklarata:
Gjatë operacionit ‘Coast to coast’, u vunë në pranga dy shtetas nën akuzën se gjatë periudhës 2021-2022, bashkëpunuan për të krijuar kompani fiktive, nëpërmjet të cilave transferuan rreth 11 milion euro me burime kriminale nga shtete që konsiderohen si ‘parajsa fiskale’ si Qipro, Gjibraltari dhe Malta, fillimisht në Shqipëri, më pas në Kanada.
Xpert systems shpk’ është njëra nga kompanitë aktive ku pronar zyrtar deri 1 Mars 2021 ka qenë njëri nga shtetasit aktualisht nën masën e ‘arrestit me burg’.
Sipas Spending Data kjo kompani për 2019-2024 ka përfituar 1.6 milion euro nga institucione shtetërore përfshirë Drejtorinë Rajonale Tatimore Tiranë, Shërbimin e Kontrollit të Brendshëm në MB, Drejtorinë e Policisë Vendore Elbasan, Gjykata e Rrethit Tiranë, Kolegji i Posaçëm i Apelimit, Autoriteti Kombëtar për Certifikimin Elektronik dhe Sigurinë Kibernetike etj.
Këto kompani po vijojnë të përfitojnë kontrata publike.
Partia Demokratike kërkon nga institucionet shtetërore përgjegjshmëri në menaxhimin e fondeve publike të shqiptarëve duke hequr dorë nga dy standardet e zakonshme ku me njërën dorë e dënojnë krimin e më tjetrën vijojnë ta ushqejnë atë me para publike.
