Edhe pak ditë na ndajnë nga ndeshja e parë e Shqipërisë në Euro 2024.
Sfida e parë e kuqezinjve të Sylvinhos do të jetë më 15 qershor në orën 21:00 përballë Italisë, ndeshje e cila do të zhvillohet në stadiumin “Signal Iduna Park” të Dortmundit.
Mesfushori i Kosovës, Valon Berisha ka dhënë një deklaratë mjaft të bukur në prag të fillimit të Europianit “Gjermani 2024”.
Duke parë përçarjet e fundit mes shqiptarëve, ku disa “quhen” apo “vetëquhen” kosovarë, Berisha ka një mesazh të qartë.
“Sigurisht që do të bëjmë tifo për Shqipërinë. Ne gjithmonë themi që jemi një, por realisht jemi një. Normal që kemi edhe pak lakmi që Shqipëria shkoi në Europian dhe ne jo, por prandaj duhet të jemi 100% me ta, pasi ne nuk patëm mundësinë që të shkonim aty. Ne shqiptarë jemi të gjithë, tani dolën këto “kosovarë”, jemi shqiptarë të gjithë. Duhet të mbështesim Shqipërinë, të bëjmë tifo për ta dhe të shkojë sa më larg”, është shprehur Valon Berisha për ATV.
