Javier Tebas, presidenti i La Ligës, ka bërë publike zgjedhjet e tij për futbollistët që i sheh si kandidatë kryesorë për Topin e Artë, duke mos përfshirë në listë talentin e Barcelonës, Lamine Yamal.
Në një intervistë dhënë për mediumin francez L’Equipe, Tebas veçoi mesfushorin spanjoll Rodri dhe sulmuesin e Real Madridit, Kylian Mbappe. Kjo zgjedhje vjen në një moment kur Yamal shihej si një nga pretendentët kryesorë për ceremoninë e çmimit, e cila ishte planifikuar të zhvillohej të hënën në Londër.
Të lidhura
None found
Megjithëse do ta konsideronte të drejtë një triumf të Mbappes, kreu i La Ligës bëri të ditur se dëshira e tij është që Rodri ta fitojë sërish Topin e Artë.
“Nëse Mbappe e fiton Topin e Artë, do ta meritonte, por shpresoj që Rodri ta përsërisë suksesin e tij”, deklaroi Tebas.
Presidenti i La Ligës vlerësoi gjithashtu rëndësinë e Mbappes në futbollin ndërkombëtar, duke nënvizuar rolin që francezi luan për ekipin e tij dhe për kampionatin spanjoll.
“Mbappe është një yll botëror, një lojtar i madh që kontribon ndjeshëm për ekipin e tij dhe për ligën në përgjithësi”, shtoi Tebas.
Gjatë intervistës, Tebas foli edhe për drejtimin e futbollit botëror dhe kritikoi presidentin e FIFA-s, Gianni Infantino. Ai kundërshtoi mënyrën e njëanshme me të cilën, sipas tij, janë marrë vendimet për zgjerimin e kalendarit të futbollit.
Ai shprehu pakënaqësi ndaj menaxhimit të FIFA-s, duke pretenduar se imazhi i këtij institucioni është dëmtuar prej vitesh.
“Imazhi i FIFA-s është dëmtuar rëndë prej vitesh. Sa i përket Infantinos, çështja është e qartë: imazhi i tij është larg të qenit ideal”, përfundoi ai.
