Policia britanike ka zbuluar një skemë të pazakontë të kultivimit të kanabisit.
63-vjeçari Jeremy Southgate bleu prona nëpër Hull dhe më pas i shndërroi në ferma ku rritej kanabisi.
Sipas medieve të huaja, ai lejoi një bandë shqiptare të krimit të organizuar “të pushtonte” shtëpitë në Hull dhe të drejtonte një rrjet prej 17 fermash kanabisi që prodhonin drogë me vlerë miliona paund.
Detektivët vlerësuan se operacioni i drogës arrinte 11.4 milionë paund në vit.
Policia e Humberside tha se hetimi filloi kur gjatë një kontrolli në një pronë të Southgate u zbuluan bimë kanabisi me vlerë 74,000 paund.
Oficerët filluan vëzhgimin e zyrës së pasurive të patundshme në pronësi të Jeremy Southgate dhe të menaxhuar nga shqiptari Florjan Kasaj.
Gjatë operacionit u kryen bastisje në 15 prona në të gjithë qytetin dhe u zbuluan mijëra bimë kanabisi, pajisje kultivimi dhe para.
U zbulua gjithashtu se Southgate kishte fituar grante qeveritare për të instaluar izolim rreth çdo ndërtese për të ndaluar zbulimin e drogës.
Policia tha se fabrikat e drogës kishin staf të përbërë nga emigrantë të paligjshëm nga Shqipëria.
Southgate, u shpall fajtor për dy akuza, prodhim dhe shitje droge dhe pastrim parash, dy akuza për mashtrim me përfaqësim të rremë dhe u burgos për 11 vjet pas një gjyqi në Gjykatën e Kurorës së Hull.
Florjan Kasaj, 41 vjeç, nga Buckingham Street, Hull u akuzua për prodhim droge të klasit B dhe u dënua me shtatë vjet.
Ervis Mrishaj, 25 vjeç, nga Peterborough, u akuzua për prodhim droge të klasit B dhe u dënua me pesë vjet e gjysmë burg.
Dardan Mrishaj, 37 vjeç, u dënua me tre vjet.
Enver Rrushi, 33 vjeç nga Passfield Crescent, Middlesbrough, u deklarua fajtor për dy akuza për prodhimin e kanabisit dhe u burgos për tre vjet.
Policia tha se 10 persona të tjerë u akuzuan gjithashtu për vepra të lidhura me drogën midis 2018 dhe 2023 si pjesë e hetimit dhe që atëherë janë dënuar.
/albeu.com
