Kampioni shqiptar i boksit, Florian Marku, i ftuar këtë mbrëmje në “Më lër të flas” në Top Channel tregoi si ka nisur pasioni dhe puna e tij për boksin.
Marku thotë se është rritur me disiplinën e boksit dhe që prej moshës 12-vjeçare, stërvitet çdo ditë intensivisht:
“Që në moshën 12 vjeç, u rrita me atë disiplinë. Orari i stërvitjes ishte si buka që haja. Jam stërvitur gjithmonë 3-4 orë në ditë. Zgjohem në 5-6 të mëngjesit, është shumë përkushtim”.
Ditët më të bukura për kampionin janë ditët në prag dhe gjatë ndeshjeve:
“Kur vjen java e ndeshjes, për mua është java më e bukur. Them shyqyr mbaruan të gjitha vuajtjet, tani është koha për të shijuar ndeshjen. Unë ndeshjen e shijoj. Jam i lumtur kur shkoj në ring, është ajo që unë dua”.
Unë kam për ta lënë boksin ditën që nuk do e shijoj më, shton Marku, pasi sikurse shprehet, “çdo gjë bëhet me dëshirë, pasion dhe dashuri”.
Por, cili është çelësi i suksesit të boksierit?
“Kur hyj në ring, them si mundem të fitoj. Ky është besoj çelësi i suksesit tim. Nuk ka për mua opsion humbje, duhet të gjej mënyrën si të fitoj”, thotë ai.
A ka diçka që Marku do të donte ta bënte ndryshe gjatë karrierës së gjatë të tij?
“Nuk bëhem pishman për asgjë, se ndryshe nuk do të isha këtu ku jam sot. Ja i lumtur për gjithçka që kam bërë”, përgjigjet ai.
